2025/26 mövsümündə Türkiyə çempionatında çıxış edəcək 3-cü debütantın adına aydınlıq gəlib.

"Football-plus.az" xəbər verir ki, Sakaryada pley-offun finalında “Fatih Karagümrük”lə “Bandırmaspor” qarşılaşdı. Qeyd edək ki, 30-cu dəfə keçirilən pley-off sistemində Sakarya ilk dəfə finala evsahibliyi etdi. “Fatih Karagümrük” 1-ci liqada mövsümü 3-cü pillədə tamamladığından birbaşa pley-offun finalında oynamaq haqqı qazanmışdı.

“Bandırmaspor” isə finala gedən yolda əvvəlcə “Ərzurumspor”u, sonra da “Boluspor”u mübarizədən kənarlaşdırmışdı. Böyük azarkeş ordusu ilə Sakaryaya yollanan Bandırma təmsilçisi çox istəkli idi. Çünki 60 illik tarixə malik bu komanda qalib gələcəyi təqdirdə ilk dəfə elitada oynamaq fürsəti qazanacaqdı. “Bandrımaspor” fasiləyə minimal üstünlüklə yollansa da, davamını gətirə bilmədi.

“Fatih Karagümrük” 2-ci hissənin əvvəllərində fanatlarını ayağa qaldırdı və əsas vaxt 1:1 hesabı ilə yekunlaşdı. Əlavə vaxtın əvvəllərində “Karagümrük” oyunda ilk dəfə önə keçdi. 104-cü dəqiqədə bu komandanın baş məşqçisi Onur Can Korkmaz qırmızı vərəqə aldı. Buna baxmayaraq, “Fatih Karagümrük” əlavə vaxtın 1-ci hissəsi tamam olmamış daha bir qol vurdu.

Beləliklə, 3:1 üstün olan İstanbul təmsilçisi birillik fasilədən sonra Türkiyə futbolunun elitasına qayıtdı. Bu kollektiv sonuncu dəfə 2023/24-də superliqada oynamış və 18-ci yeri tutaraq aşağı liqaya yuvarlanmışdı. Ümumilikdə “Fatih Karagümrük” elitada 11-ci mövsümünü keçirəcək. Özü də gələn il bu komanda 100 illik yubileyini qeyd edəcək!

Əslində “Fatih Karagümrük”ün 1-ci liqada mövsümü ilk “2-lik”də tamamlayaraq elitaya birbaşa vəsiqə qazanacağı güman olunurdu. Amma komanda bu hədəfə çata bilməyincə baş məşqçi Orhan Ak ilə yollarını ayırdı. Onu yüksək səviyyədə baş məşqçi təcrübəsi olmayan Onur Can Korkmaz əvəzlədi və 33 yaşlı gənc mütəxəssis qarşıya qoyulan hədəfə çatmağı bacardı. Amma “Fatih Karagümrük”ün superliqaya başqa məşqçinin rəhbərliyi altında hazırlaşacağı gözlənilir.

Xatırladaq ki, 1-ci liqada ilk iki pillə “Kocaelispor” ilə “Gənclərbirliyi”nə qismət oldu. Kocaeli təmsilçisi 16, Ankara təmsilçisi isə 4 illik fasilədən sonra elitaya vəsiqə qazandı.