Nəhayət, Anxel Di Mariyanın yeni komandası müəyyənləşib. Argentina yığmasının sabiq oyunçusu uzun illərdən sonra vətənində çıxış edəcək.

“Benfika”dan ayrılan 37 yaşlı yarımmüdafiəçi sabiq klubu “Rosario Sentral”a qayıdıb. Bu haqda klubun mətbuat xidmətinin yaydığı məlumatda müqavilənin şərtlərinə aydınlıq gətirilməyib.

“Rosario Sentral”ın yetirməsi olan Di Mariya 2005-07-ci illərdə Argentina klubunun əsas komandasında oynayıb. Anxel bu müddət ərzində göy-sarı formada bütün turnirlərdə 39 matçda meydana çıxıb, 6 qol vurub və 2 məhsuldar ötürmə edib.

Di Mariya uğurlarla zəngin olan karyerası ərzində “Benfika”, “Real”, “Mançester Yunayted”, PSJ və “Yuventus”un da formasını geyib. Onun 2022-ci ildə Qətərdə keçirilən dünya çempionatının qalibi olduğunu da xatırladaq.

Anxel formasında 145 oyuna 31 qol vurduğu Argentina yığmasındakı çıxışını 2024-cü ildə başa vurub.