Həftəsonu “Qalatasaray”lılar üçün əsl bayram ab-havasında keçdi. “Qalatasaray” camiəsi Türkiyədə bir ilkə imza atdı.

Belə ki, çempionluq kuboku komandaya stadionda yox, başqa məkanda – “Yenikapı”da yerləşən mitinq meydanında təqdim olundu. Hələ şənbə günündən fanatlar bura axın etməyə başladı. İlk gündə fanzonanı təxminən 60 min azarkeş ziyarət etdi. Burda quraşdırılan nəhəng ekran vasitəsilə fanatlar həm də birlikdə “Qalatasaray”ın səfərdə “Göztəpə”yə qarşı keçirdiyi oyunu izlədilər.

Əsas həngamə isə bazar günü yaşandı. “Yenikapı”nın qapıları fanatların üzünə saat 12.00-dan açıldı və şadyanalıq gecə saat 23.30-a qədər davam etdi. Komanda isə saat 17.00-da “Qalatasaray” Liseyində toplandı. Şəkil çəkdirmə mərasiminin ardından “Qalatasaray” üstüaçıq avtobusla yola düşdü. Saat 19.40-da avtobus Sarayburnuya çatandan sonra futbolçular gəmiyə mindilər. Oyunçuları aparan gəmini 50-dən çox kiçik gəmi müşayiət etdi və ortaya gözəl görüntülər çıxdı.

Bütün bu müddət ərzində isə “Yenikapı”da fanatları müxtəlif sənətçilər əyləndirdi. Orda təşkil olunan gözəl şou ilə fanatlar unudulmaz anlar yaşadılar. Nəhayət, hava qaralandan sonra komanda “Yenikapı”ya çatdı və futbolçular bir-bir səhnəyə dəvət olundular.

Bu tədbirin zirvə nöqtəsi isə komandaya təqdim olunan çempionluq kuboku oldu. Kubokun federasiya prezidenti İbrahim Hacıosmanoğlu tərəfindən yox, qurumun başqan vəkili Məcnun Odyakmaz tərəfindən təqdim olunması diqqəti çəkdi. Hacıosmanoğlu, ümumiyyətlə, bu tədbirdə iştirak etmədi. Bu məqam növbəti dəfə onunla “Qalatasaray” arasında münasibətlərin qaydasında olmadığını sübut etdi.