Bu mövsüm qazandığı tarixinin 25-ci çempionluğunu mayın 25-də ''Yenikapı''da 700 minə yaxın azarkeşin iştirakı ilə təşkil olunan möhtəşəm tədbirlə qeyd edən ''Qalatasaray'' bununla kifayətlənmək istəmir.

Bu dəfə çempionluğu qeyd etmək növbəsi ''1905 GSYİAD'', yəni ''Qalatasaraylı Yönətici və İş Adamları Dərnəyi''nindi. Özü də dərnək Okan Buruk və futbolçuların böyük əksəriyyətinin iştirak edəcəyi tədbiri elə-belə yerdə yox, ''Four Season Hotel''də keçirməyi planlaşdırır. İlk baxışdan burda qeyri-adi bir şey yoxdu. Amma məsələ burasındadı ki, ''Fənərbaxça''nın dünyaca ünlü məşqçisi Joze Mourinyo Türkiyəyə gəldiyi gündən bu yana ev tutmayıb və məhz bu oteldə yaşayır!

''İstanbul Boğazı''nın ən görkəmli yerində yerləşən və Türkiyənin ən dəbdəbəli otellərindən olan bu oteldə ən ucuz otağın gecəsi 1000 avrodu. İddialara görə dərnəyin çempionluq tədbiri keçirdiyi gündə Mourinyo da oteldə olacaq. Özü də tədbirə ''Mc Livinho'' da dəvət olunacaq. Onun ''Pode Sentar'' adlı mahnısı bu mövsüm ''Qalatasaray''lı futbolçuların ən çox dinlədiyi və ən sevimli mahnılarından biridi.

Qısası, ''Qalatasaray''lı iş adamları çempionluğu Mourinyonun qulağının dibində qeyd edəcək!