Gözlənildiyi kimi, Serjio Konseysao “Milan”ı tərk edib. İtaliya klubu ötən ilin dekabrında baş məşqçi təyin olunan portuqaliyalı ilə əməkdaşlığı dayandırıb.
Konseysaonun bağladığı müqavilə ilyarım müddətinə nəzərdə tutulmuşdu.

“Milan”ın sözləşməni vaxtından əvvəl pozduğu üçün məşqçiyə nə qədər təzminat ödəyəcəyinə rəsmən aydınlıq gətirilmir. Xatırladaq ki, onun rəhbərliyi altında İtaliya Superkubokunun qalibi olan komanda A seriyasını 8-ci yerdə başa vurmaqla avrokuboklara vəsiqə qazana bilməyib.

Artıq “Milan”ın yeni çalışdıcısı məlumdu. Klubun yaydığı məlumatda Massimiliano Alleqrinin baş məşqçi vəzifəsinə təyin olunduğu elan edilib. Bir neçə gün əvvəl yerli KİV-də “Milan”nın ona ikiillik müqavilə təklif etdiyi bildirilmişdi. 57 yaşlı mütəxəssisin ilə 5 milyon avro maaş alacağı iddia edilir. Müqavilədə əlavə bonus ödənişləri də nəzərdə tutulub.

Alleqri 2010-14-cü illərdə də “rossonyeri”nin baş məşqçisi olub. “Milan” onun rəhbərliyi altında 2010/11 mövsümündə İtaliya çempionu olub və ölkə superkubokunu qazanıb.

Alleqrinin sonuncu iş yeri 2021-24-cü illərdə çalışdırdığı “Yuventus” olub.