Konseysao ilə Felişin aqibəti müəyyənləşib
Artıq Serjio Konseysaonun “Milan”dakı aqibəti müəyyənləşib. O, mövsümün sonunda baş məşqçi vəzifəsini tərk edəcək.
Məşhur insayder Fabritsio Romanonun məlumatına görə, klub rəhbərliyi 2026-cı ilin iyununa qədər müqaviləsi olan portuqaliyalı mütəxəssis ilə yolları ayırmaq qərarına gəlib. 50 yaşlı Konseysao komandaya 2024-cü ilin dekabrında təyin edilib. Komanda onun rəhbərliyi altında bütün turnirlərdə 24 oyun keçirib, 11 qələbə qazanıb, 5 dəfə heç-heçə edib və 8 matçda məğlub olub.
Romanonun məlumatına görə, baş məşqçinin “Çelsi”dən icarəyə götürülən həmyerlisi Joao Feliş də komandanı tərk edəcək. Portuqaliyalı futbolçu “Milan”ın heyətində A seriyasında keçirdiyi 10 oyunda məhsuldar fəaliyyət göstərə bilməyib.
Yeri gəlmişkən, Konseysao komandadan ayrılacağı haqda məlumata münasibət bildirib. O, bu iddianı təkzib etməyib:
“Mən bura gəlib superkuboku qazanandan bəri hər gün “Milan”a tezliklə yeni məşqçinin təyin olunacağı barədə danışılır. Mənim üçün fərqi yoxdu, amma komanda bu xəbərləri oxuyur və buna görə də oyunumuzda stabitlik yoxdu. Sabah daha yaxşı olmaq üçün bu gün çalışmalıyıq. Mənim üçün də asan deyil. Çünki mənə lazımi hörmət yoxdu. Bəziləri elə danışırlar ki, sanki “Milan”ın baş məşqçisi komandaya heç futbol oynatmayıb. Gələcəyim heç nədən asılı deyil. Ölkə kubokunu qazanmaq üçün “İnter”lə növbəti oyuna hazırlaşmalıyam”.
Digər xəbərlər
