Dünən Çempionlar Liqasında böyük maraqla gözlənilən final qarşılaşması baş tutdu.

Münhendə PSJ ilə ''İnter'' üz-üzə gəldi. Milan nəhəngi əvvəlki mərhələlərdə ''Bavariya'' və ''Barselona'' kimi ''əjdahalar''ı geridə qoysa da, finalda sürpriz şəkildə pərən-pərən düşdü!

Darmadağının əsasını 7-ci dəqiqədə ''İnter''in sabiq futbolçusu Əşrəf Hakimi qoydu. Finala damğa vuran isim isə Dezire Due oldu. İlk qolda aktivinə məhsuldar ötürmə yazan gənc ulduz, 20-ci dəqiqədə özü də fərqləndi. O, 19 yaş 362 günlüyündə ÇL-in finalında həm qol vuran həm də məhsuldar ötürmə verən ən gənc futbolçu oldu!

Hər cəhətdən rəqibini üstələyən PSJ fasilədən sonra da üstün oyununu davam etdirdi. Due 63-cü dəqiqədə daha bir qol vurmaqla adını tarixə yazdırdı. Belə ki, turnir ÇL adı ilə keçirilməyə başlandığı 1992-ci ildən bu yana finalda 3 qolun vurulmasında yaxından iştirak edən futbolçu olmamışdı! Çox keçmədən Xviça Kvaratsxeliya da təkbətək fürsəti boşa verməyərək komandasının 4-cü qolunu vurdu. O, ÇL-in finalında qol vuran ilk gürcüstanlı futbolçu kimi tarixə düşdü.

PSJ bununla da kifayətlənməyərək hesabı biabırçı həddə çatdırdı. 19 yaş 14 günlük Senni Mayulu yekun nəticəni müəyyənləşdirdi. O, 1995-ci ildə ''Ayaks''ın heyətində 18 yaş 327 günlüyündə ''Milan''a qol vuran Patrik Klyuvertin ardından finalda qol vuran ən gənc ikinci futbolçu oldu.

Ümumiyyətlə, maraqlıdı ki, ÇL-in finalında qol vuran 5 ən gənc futbolçudan ikisi məhz bu oyunda fərqləndi! Avropanın ən böyük klub turnirinin finalında ilk dəfə 5 top fərqli qələbə qeydə alındı! Buna qədər ən böyük fərq 4 top idi və bu, 4 finalda qeydə alınmışdı.

Beləliklə, PSJ tarixində ilk dəfə ÇL-i qazandısa, eyni zamanda bunu bacaran cəmi 2-ci Fransa təmsilçisi oldu. Fransızlardan ilk zəfəri 1993-də ''Marsel'' əldə etmişdi. Daha öncə 2015-də ''Barselona''nı Avropanın ən güclüsü edən Luis Enrikə iki fərqli klubla ÇL-i qazanan 7-ci məşqçi oldusa, Xosep Qvardioladan sonra iki fərqli klubla trebl qazanan cəmi 2-ci mütəxəssis oldu! ''İnter''ə gəlincə komanda son 3 ildə ikinci dəfə finalda uduzdu. 2023-də milanlılar ''Mançester Siti''yə minimal hesabla boyun əymişdilər.

Beləcə, təxminən 40 gün öncə hələ trebl arzusu ilə yaşayan ''İnter'' mövsümü titulsuz başa vurdu! İtaliya klublarının ÇL həsrəti isə 15 ilə yüksəldi. Bu ölkə təmsilçilərindən bu titulu sonuncu dəfə 2010-cu ildə məhz elə ''İnter'' qazanıb.