Çempionlar Liqasında ''İnter''in ardından ikinci finalçı da bəlli oldu.

''Football-plus.az'' xəbər verir ki, PSJ yenə ''Arsenal''dan üstün oldu. Ötən həftə Londonda minimal hesabla qalib gələn Paris nəhəngi bu dəfə evdə 2:1-lik qələbə qazanaraq finala yüksəldi.

Beləliklə, mayın 31-də Münhendə baş tutacaq həlledici oyunda ''İnter'' ilə PSJ üz-üzə gələcək. Turnir bu adla keçirilməyə başlandığı 1992-ci ildən bu yana PSJ iki fərqli mövsümdə finala yüksələn ilk Fransa təmsilçisi oldu. Bu komanda 2020-də də finalda oynamış, amma ''Bavariya''ya məğlub olmuşdu (0:1). Cavab matçında 3,14 xG (qol gözləntisi) yaxalamasına və qapıya 19 zərbə vurmasına baxmayaraq cəmi 1 qol vuran ''Arsenal'' yenə uğursuz ənənəni davam etdirdi.

Bu komanda buna qədər tarixi ərzində avrokubokların pley-offunda ilk matçda evdə məğlub olduğu 5 halın heç birində mərhələ adlaya bilməmişdi. Göründüyü kimi bu dəfə də ilkə imza atmaq mümkün olmadı.

Ümumiyyətlə, ''Arsenal'' hazırda yarımfinal sindromu yaşayır. Təkcə bir faktı vurğulayaq ki, bütün turnirləri nəzərə almaqla ''topçular'' ardıcıl 4-cü dəfə yarımfinal səddini aşa bilmədi. Bu seriya hələ 2020/21-dən başlayıb. Həmin mövsümdə London nəhəngi həm Avropa Liqasında, həm də İngiltərə liqa kubokunda mübarizəni finalın biraddımlığında dayandırmalı olmuşdu. Bu mövsüm də liqa kubokunda yarımfinalda uğursuzluğa düçar olan Mikel Artetanın kollektivi indi də ÇL-də eyni aqibətlə üzləşdi.