Çempionlar Liqasının 1/4 finalının ilk oyunlarına yekun vuruldu.

''Football-plus.az'' xəbər verir ki, ikinci oyun günündə favoritlər qələbə qazandı. PSJ ''Aston Villa''nı 3:1 məğlub edərək cavab oyunu ərəfəsində 2 topluq üstünlük yaxaladı. ''Barselona'' isə Dortmund ''Borussiya''sını 4:0 darmadağın etməklə faktiki olaraq cavab matçını formallığa çevrildi.

Rafinya ilə Yamalın hərəyə bir, Levandovskinin isə iki qol vurduğu oyunda bir sıra maraqlı göstəricilər qeydə alındı. Öncə qeyd edək ki, ''Barsa'' 2025-ci ildə keçirdiyi 23-cü rəsmi oyunda da uduzmamaqla (19 qələbə, 4 heç-heçə) şəxsi rekordunu yenilədi. Əvvəlki rekord 2016-da qeydə alınmışdı. Həmin vaxt komanda ilin ilk 22 rəsmi oyununda uduzmamışdı (19 qələbə, 3 heç-heçə). Əla mövsüm keçirən Rafinya 4 qoldan 3-də yaxından iştirak edərək matçı 1 qol, 2 məhsuldar ötürmə ilə tamamladı. ''Sambaçı'' bu mövsüm ÇL-də artıq 19 qolda yaxından iştirak edərək (12 qol, 7 məhsuldar ötürmə) Lionel Messinin rekordunu indidən təkrarlamağa müvəffəq olub.

Messi ''Barselona'' karyerasında ÇL-də rəqəmlər baxımından ən uğurlu mövsümündə (2011/12) məhz 19 qolun vurulmasında iştirak edib (14 qol, 5 məhsuldar ötürmə). Levandovski də ÇL-də 10 qol həddinə çatmaqla unikal göstəriciyə nail oldu. O, bu turnirdə üç fərqli klubun heyətində bir mövsümdə 10 qol vuran ilk futbolçu kimi tarixə düşdü! Rafinyanın hesabı açdığı epizod müəyyən söz-söhbətlərə səbəb oldu. Belə ki, qolu əslində gənc mərkəz müdafiəçisi Kubarsi vurmalı idi. Amma Kubarsinin zərbəsindən sonra top boş qapıya yönələrkən Rafinya son anda sürüşərək topa toxundu. Braziliyalı futbolçu ofsayda düşməyə çox yaxın idi. Amma VAR incələməsindən sonra qol qeydə alındı.

Maraqlıdı ki, Rafinya oyundan sonra bu epizoda görə Kubarsidən üzr istədiyini etiraf etdi. Kubarsiyə qol yox, məhsuldar ötürmə yazıldı. Amma bu göstəricidə də, o, tarixə düşdü. İstedadlı müdafiəçi 18 yaş 77 günlüyündə ÇL tarixində məhsuldar ötürmə verən ən gənc futbolçu oldu! Əvvəlki rekord Vensan Kompaniyə məxsus idi.

Hazırda ''Bavariya''nı çalışdıran Kompani 2004-cü ilin oktyabrında ''Anderlext''in heyətində ''Verder''lə oyunda 18 yaş 193 günlüyündə assist eləmişdi.