''Fənərbaxça''nın sabiq futbolçusu, hazırda karyerasını ''Eyüpspor''da davam etdirən Canər Ərkinlə bağlı maraqlı xəbər yayılıb.

''Football-plus.az'' xəbər verir ki, superliqanın 17-ci turunda ''Eyüpspor''la ''Fənərbaxça''nın dueli 1:1-lik bərabərliklə yekunlaşmışdı. Həmin qarşılaşmanın fasiləsində böyük qalmaqal qopmuşdu. Qalmaqalın əsası fasilədən bir neçə dəqiqə öncə ''Fənər''in vurduğu bərabərlik qolu zamanı qoyulmuşdu. Cinahda top uğrunda mübarizə zamanı İrfan Can Kahvecinin dirsəyi Canərin üzünə tuş gəlmişdi. Amma hakim oyunu davam etdirmiş və həmin hücum Ən-Nəsirinin qolu ilə yekunlaşmışdı. Bu epizod meydan sahiblərinin çox böyük narazılığına səbəb olmuş, hətta ''Eyüpspor''un baş məşqçisi Arda Turan tribunaya göndərilmişdi. Gərginlik paltardəyişmə otağına aparan dəhlizdə də davam etmiş, iki komandanın üzvləri arasında çaxnaşma yaşanmışdı. Bunu oyunsonrası mətbuat konfransında Joze Mourinyo da təsdiqləmişdi.

Bu arada məlum olub ki, həmin matçın fasiləsində Canər Ərkin həm ''Fənər''in futbolçularını, həm də məşqçilər korpusuna ağır söyüşlərlə təhqir edib. Bunu ortaya çıxaran isə Mourinyo olub. Belə ki, ünlü mütəxəssis aləm bir-birinə dəyərkən telefonunu çıxararaq baş verənləri bir müddət videoya çəkib. Canərin söyüşləri də məhz həmin videoya düşüb. Bunun ortaya çıxmasının ardından isə ''Fənərbaxça''da Canərin klub üzvlüyünün ləğv olunması məsələsi gündəmə gəlib. 36 yaşlı müdafiəçi ''Fənər''də 2010-16-cı illərdə, eləcə də 2020/21 mövsümündə çıxış edib. O, uzun illərdi, klubun rəsmi üzvüdü və prezident seçkilərində də dəfələrlə iştirak edərək səs verib.

Türkiyə mətbuatının yazdığına inansaq, Canərin üzvlüyünün ləğv olunması məsələsi ilə klubun sabiq prezidenti Əziz Yıldırım özü məşğul olur. Daha öncə ''Qalatasaray'' və ''Beşiktaş''da da forma geymiş Canər bu mövsüm ''Eyüpspor''da 13 rəsmi oyunda iştirak edərək aktivinə 1 məhsuldar ötürmə yazıb.

ƏLİ