''Fənərbaxça''nı çempion edə bilməyən və gözdən düşən Joze Mourinyonun gələn mövsüm klubun başında yer alıb-almayacağı bilinmir.

''Football-plus.az'' xəbər verir ki, hazırda bu məşqçinin ən azı gələcəyi qədər müzakirə olunan daha bir mövzu onun təzminatıdı.

Bu arada Mourinyonun müqaviləsində önəmli bir maddənin yer aldığı məlum olub. Bilindiyi kimi ötən yay ''Fənərbaxça''da prezident seçkiləri keçirilmişdi. Mourinyo prezidentliyə hər iki namizəd - həm Əziz Yıldırım, həm də Əli Koçun əsas hədəfi idi. Bu məşqçi onların hər ikisi ilə anlaşaraq müqaviləyə özü üçün sərfəli olan mühüm bir maddə saldırıbmış.

Belə ki, klubla hələ birillik müqaviləsi olan Mourinyo ''Fənər''dən ayrıldıqdan sonra hətta başqa kollektivlə anlaşsa belə, təzminat almaqda davam edəcək! Yəni camiədə artıq sevilməyən bu məşqçi istefaya göndəriləcəyi təqdirdə İstanbul nəhəngi 15 milyon avro təzminat ödəməli olacaq. Onun köməkçiləri ilə birlikdə illik qazancı məhz bu qədərdi. ''Sarı-lacivərdlilər'' üçün yeganə çıxış yolu Mourinyonun öz istəyilə istefa verməsidi. Yalnız bu halda komanda 15 milyon avroluq təzminatı ödəməkdən qurtulacaq.

62 yaşlı mütəxəssisin karyerasına nəzər salsaq, görərik ki, işlədiyi klublardan təzminat almaq belə desək, onun ən sevdiyi işlərdən biridi. 25 il ərzində yalnız 1 dəfə öz istəyilə istefa verən Mourinyo indiyə qədər işlədiyi klublardan ümumilikdə 85,5 milyon funt sterlinq təzminat alıb!

Daha dəqiq desək, o, 2007-də ''Çelsi''dən 18 milyon funt sterlinq, 2013-də ''Real''dan 13 milyon funt sterlinq, 2015-də yenidən ''Çelsi''dən 12,5 milyon funt sterlinq, 2018-də ''Mançester Yunayted''dən 17 milyon funt sterlinq, 2021-də ''Tottenhem''dən 18 milyon funt sterlinq, son olaraq ''Roma''dan 3 milyon funt sterlinq təzminat almışdı.