Ölkə kubokunun həlledici oyunu ərəfəsində diqqət yalnız iştirakçı komandalara yox, eyni zamanda bu gərgin qarşılaşmanı idarə edəcək hakimlər briqadasına da yönəlib.

Mayın 29-da “Lerik”lə “Şirvan” arasında keçirilən pley-off oyununun idarəçiliyinin Əliyar Ağayevə tapşırılması o anlama gəlirdi ki, kubokun həlledici oyununu ölkənin ən təcrübəli hakimi idarə etməyəcək. Belə də oldu. “Qarabağ”la “Sabah” arasındakı oyun İnqilab Məmmədova həvalə olundu.

Görəsən, Məmmədov bu mövsüm sözügedən komandaların neçə oyununu idarə edib, həmin oyunlarda nə ilə yadda qalıb?

İnqilab Məmmədov “Sabah”ın 4 oyununda baş hakim kimi çıxış edib. Onun idarə etdiyi ilk qarşılaşma premyer-liqanın 1-ci turunda “Sabah”la “Şamaxı” arasında baş tutub. Bu matç 2:2 hesablı bərabərliklə yekunlaşıb. “Sabah” futbolçularından yalnız biri sarı vərəqə ilə cəzalanıb. Oyunun idarəçiliyində mübahisəli epizod qeydə alınmayıb.

Növbəti önəmli qarşılaşma 8-ci turda baş tutub. Bu dəfə “Sabah” səfərdə “Qarabağ”la qarşılaşıb və dramatik oyunda 2:3 uduzub. Oyunun gedişində bəzi emosional məqamlar diqqət çəkib. Hər iki komandanın baş məşqçisi hakimin qərarılarına sərt etiraz edib və bu, onlara sarı vərəqə bahasına başa gəlib. “Sabah”dan iki, “Qarabağ”dan bir futbolçu sarı vərəqə ilə cəzalanıb.

Premyer-liqanın 17-ci turunda “Sabah” səfərdə “Araz-Naxçıvan”la qarşılaşıb və minimal hesabla qalib gəlib. Oyunun sakit keçdiyini demək olar. “Sabah”ın yalnız bir futbolçu sarı vərəqə alıb.

Misli premyer-liqasının 22-ci turunda  “Sabah” “Turan Tovuz”u qəbul edib və 2:1 hesablı qələbə qazanıb. Bu görüşdə isə mübahisəli epizodlar diqqəti çəkib. Hər iki komandanın bir qolu qeydə alınmayıb. Hakimin qərarları müəyyən narazılığa səbəb olub. Hətta həmin matçdan sonra “Turan Tovuz” AFFA Hakimlər Komitəsinin sədri Frank De Blekerenin qarşılaşma ilə bağlı fikirlərini səbirsizliklə gözlədiyini ictimaiyyətə çatdırmışdı.  

“Qarabağ”ın bu mövsüm premyer-liqadakı üç oyununda məhz İnqilab Məmmədov iş başında olub. Yuxarıda bu oyunlardan biri haqda danışdıq. Premyer-liqanın 5-ci turunda ağdamlılar səfərdə “Zirə” ilə qarşılaşıb və inamlı qələbə qazanıb (3:1). Bu oyunda “Qarabağ”dan heç bir futbolçu sarı vərəqə ilə cəzalanmayıb. Hakimlik baxımından isə matç sakit məcrada keçib.

Misli premyer-liqasının 29-cu turunda “Qarabağ” “Zirə”ni qəbul edib və bu dəfə də qələbə qazanıb (1:0). Oyunun sonlarında baş verən penalti epizodu diqqəti çəkib. “Zirə”nin futbolçusu Qismət Alıyev penaltini dəqiq yerinə yetirə bilməyib. Həmin oyunda “Qarabağ”dan yalnız bir futbolçu sarı vərəqə alıb.

ƏSƏD SEYİDOV