Bu gün ölkə kubokunun final matçı baş tutacaq. "Bakcell Arena"da, saat 20.00-da başlayacaq oyun titulun sahibini müəyyənləşdirəcək.

Sözügedən matça təcrübəli hakim İnqilab Məmmədov təyinat alıb. Görəsən, referinin ayağı hansı kluba düşərlidi?

Cavab üçün sözügedən klubların baş hakimin idarəçiliyi altında oyunlarına nəzər salaq.

"Football-plus.az"ın araşdırmasına görə, fit sahibi Misli premyer-liqasının 9-cu turunda "Neftçi" - "Turan Tovuz" matçında (0:0) ev sahiblərinə 2, qonaqlara 4 sarı vərəqə göstərib. 32-ci turda "Neftçi" - "Qarabağ" derbisində (2:4) hər iki komanda sarı, "ağ-qaralar" qırmızı vərəqə ilə cəzalandırılıb.

Baş hakim 2022/23 "futbol ili"də "Qəbələ"nin premyer-liqa qarşılaşmalarına təyinat almasa da, ölkə kubokunun 1/4 finalında "Qarabağ"la əhəmiyyətli görüş (1:0) ona tapşırılıb. Sözügedən matçda qəbələlilər 4, "köhlən atlar" 3 sarı vərəqə alıb.

Beləliklə, İnqilab Məmmədov "Neftçi"nin 2 (1 heç-heçə, 1 məğlubiyyət) "Qəbələ"nin 1 (qələbə) matçını idarə edib. Statistika "Qəbələ"nin xeyrinədi. Buna 2018/19 mövsümündə keçirilən ölkə kubokunun final matçında da rast gəlirik. Bu hakimin idarə etdiyi oyunda "Qəbələ" "Sumqayıt"ı məğlub edərək (1:0) kuboka yiyələnib. Görək, bu dəfə necə olacaq?

KƏNAN BAHADIR