“Real”ın əfsanəsi Yamala tərif yağdırdı
“Barselona”nın və İspaniya yığmasının gənc ulduzu Lamin Yamal adından söz etdirməkdədi.
"Football-plus.az" xəbər verir ki, bu futbolçu son olaraq İspaniya kubokunun yarımfinalında “Atletiko” ilə səfər oyununda Ferran Torresin vurduğu yeganə qolda hesabına məhsuldar ötürmə yazdı.
Yamal bu mövsüm 41 rəsmi oyunda artıq 30 qolun vurulmasında yaxından iştirak edib (13 qol, 17 məhsuldar ötürmə). Xatırladaq ki, Yamalın hələ heç 18 yaşı da tamam olmayıb. Onun 18 yaşı iyulun 13-də tamam olacaq!
Bu arada ESPN 21 yaşa qədər futbolçular arasında dünyanın ən yaxşılarının siyahısını müəyyənləşdirib. Məşhur telekanal siyahını müəyyənləşdirərkən futbolçunun ən yüksək səviyyədə oynamasını, onun sabitliyini və potensialını nəzərə alıb. Eyni zamanda reytinqi müəyyənləşdirən kanalın əməkdaşı Avropada çalışan bir neçə peşəkar skaut və idman direktorlarının da fikirlərini öyrəndiyini, eləcə də şəxsi simpatiyasını da əlavə etdiyini vurğulayıb.
Siyahıya artıq başa düşdüyünüz kimi Yamal başçılıq edir. “Bayer-04” və Almaniya yığmasının üzvü Florian Virts 2-ci, “Real” və İngiltərə yığmasının yarımmüdafiəçisi Cud Bellingem 3-cü pillə qərarlaşıb. Maraqlıdı ki, “Real” və Türkiyə yığmasının gənc ulduzu Arda Gülər ESPN-in siyahısında ilk “10-luğ”a düşməyib. Halbuki o, italyanlar tərəfindən hazırlanan daha nüfuzlu “Golden Boy” mükafatının ötən ilki sıralamasında 2-ci pilləni tutmuşdu. ESPN-in siyahısında “10-luq”da digər pillələrdə bu isimlər qərarlaşıb: Pau Kubarsi (Barselona), Joao Neveş (PSJ), Uorren Zair-Emeri (PSJ), Xavi Simons (Leyptsiq), Qavi (Barselona), Aleksandar Pavloviç (Bavariya), Savio (Mançester Siti).
Bu arada “Real”ın əfsanələrindən biri olan Quti Ernandes də Yamalın bu yaşda bu cür performans sərgiləməsinə biganə qala bilməyib. O, hətta Lionel Messinin belə bu yaşda bu cür “hoqqa” vermədiyini bildirib. Madrid nəhəngi ilə 3-ü ÇL olmaqla 15 titul qazanan Quti bunları deyib:
“Yamal meydanda inanılmaz işlər görür. Onun etdikləri mənim etdikərimdən bir neçə işıq ili öndədi. Yamala ən yaxşı futbolçu demək olarmı? “Ən yaxşı” ifadəsini hərə bir cür anlayır. Mənim üçün ən yaxı futbolçu hər tur bu ada layiq görülən oyunçudu. Amma Yamal heç də hər tur bu ada layiq görülmür. Eyni sözləri elə Vinisius və Mbappe haqda da demək olar. Yamalın istedadının “çərçivəsi” yoxdu. Düzdü, bəziləri onun məhsuldarlığının aşağı olduğunu iddia edir. Amma qol vurmadığı oyunlarda Yamal məhsuldar ötürmə ilə nəticəyə təsir göstərir. O, bir hərəkətlə oyunun taleyini həll etməyə qadir olan futbolçulardandı. Messinin bu yaşda belə şeylər etdiyini xatırlamıram. Yeniyetmə yaşda bütün bunlara La Liqa kimi çətin turnirdə nail olmaq inanılmazdı. Yamal birmənalı şəkildə “Barselona”nın gələcəyidi”.
Digər xəbərlər
