Mövsüm sonuna çatdıq və klubların yayda etdiyi transferlərin real faydası daha aydın göründü. Son mövsümdə ümidləri doğrultmayan onlarla futbolçu var ki, belələri üçün xərclənən pul, sadəcə, havaya sovruldu.

Bu yazıda 2024/25 mövsümündə premyer-liqaya böyük ümidlərlə gətirilsə də, gözlənilən faydanı verməyən 5 transferi xatırladacağıq.

1. İvan Lepinitsa (Sabah) 
2024-cü ilin yayında Xorvatiyanın “Slaven Belupo” klubundan 500 min avroya gətirilən Lepinitsa əslində mövsümə pis başlamadı. Amma yaxşı başlanğıc başqadı, mövsüm boyunca sabit oyun göstərmək başqa. Yarımmüdafiəçi cəmi 10 oyunda iştirak etdi, yalnız 1 qol və 1 məhsuldar ötürmə ilə yadda qaldı. Oktyabrda “Zirə” ilə matçda aldığı ağır zədə isə onun ümidləri ilə bərabər klubun da planlarını alt-üst etdi. Nəticədə bu transfer daha çox “israf olunmuş yatırım” kimi yadda qaldı.

2. Silvanus Nimeli (Sumqayıt)
Liberiyalı hücumçu böyük ümidlərlə, 600 min avro bazar dəyəri ilə “Sumqayıt”a gətirildi. Amma gözləntilər az qala sıfır nəticə ilə qarşılandı. Premyer-liqada oynadığı dəqiqələr sayılacaq qədər az olan Nimeli nə qol, nə də ötürmə ilə yadda qaldı. Onu da qiymətinə görə “vaxtını doldurub pul yandıran” transfer kimi qiymətləndirmək olar.

3. Rafael Quzzo (Neftçi)
“Neftçi”nin yay transfer planında əsas müdafiə dayağı kimi nəzərdə tutulan Rafael Quzzo da gözləniləni verə bilmədi. 400 min avroya gətirilən 26 yaşlı braziliyalı stopper mövsüm ərzində 15 oyunda çıxış etsə də, yalnız 10-da start heyətində yer aldı. Oyun müddəti 900 dəqiqə ilə məhdudlaşdı. Qol və assist göstəricisi sıfır olan futbolçu meydanda liderlik keyfiyyətləri göstərə bilmədi və nəticədə “sakit, amma səssiz” bir transfer kimi yadda qaldı. Ümumi mənzərə onun bu mövsüm komandasına gözlənilən səviyyədə fayda verə bilmədiyini göstərdi.

4. Ramil Şeydayev (Neftçi)
Yerli ulduz statusuna malik Şeydayevdən “Neftçi”də möhtəşəm dönüş gözlənilirdi. Amma rəqəmlər tam fərqli danışır: 24 oyun, 1573 dəqiqə, cəmi 4 qol (onlardan biri penaltidən), 0 assist. Fiziki hazırlıq və psixoloji motivasiya baxımından da bəzi suallar doğuran çıxışı ilə Şeydayev bu mövsüm gözləntilərin çox gerisində qaldı. Təəssüf ki, bu da onu uğursuz transferlər siyahısına salır.

5. Neqoş Kupusoviç (Sabah)
300 min avroya transfer edilən serbiyalı hücumçu mövsüm ərzində nəinki komandanın hücumuna rəng qata bilmədi, əksinə, bir çox matçda gözdən itdiyinin fərqinə belə varılmadı. 17 oyunda 1 qol — bəli, yalnız 1! Oyun tempi zəif, qərarları gec, təsiri isə demək olar ki, yox. Bu transfer də bir növ “düşük profil” etiketini haqq etdi.
Bu siyahı bir şeyi sübut edir: ad və məbləğ həmişə uğura təminat vermir. Zədə, uyğunlaşma, oyun sistemi və motivasiya çatışmazlığı futbolçunun dəyərini də, nüfuzunu da yerlə yeksan edə bilir.

ƏSƏD SEYİDOV