''Qalatasaray''la ''Fənər'' arasındakı məhkəmənin növbəti iclasında nələr yaşandı?
Ötən ilin mayında ''Qalatasaray'' ilə ''Fənərbaxça'' arasında baş tutan derbinin ardından yaşanan qalmaqala dair məhkəmənin növbəti iclası keçirilib.
Xatırlayırsızsa, 2023/24 mövsümünü sondan əvvəlki turunda ''Qalatasaray'' ''Fənərbaxça'' ilə ev oyununda çempionluğu rəsmiləşdirməyə hazırlaşırdı. Amma ''sarı-lacivərdlilər'' Çağlar Söyüncünün qolu ilə minimal hesabla qalib gəlmiş, ''Cim-Bom'' çempionluğunu yalnız son turda Konyada rəsmiləşdirməli olmuşdu. 2024-cü ilin mayın 19-da ''Rams Park''da baş tutan həmin derbinin ardından Əli Koç və ''Fənər''in bəzi üzvləri meydanın mərkəzində əllərində klubun bayrağı ilə xatirə şəkili çəkdirmişdilər. Məhz həmin vaxt ciddi qalmaqal yaşanmışdı. Çünki stadionun müdürü Əli Çelikkıran bayrağı onların əlindən almaq və şəkil çəkmələrinə mane olmaq istəmişdi. Həmin an ''Fənər''in bəzi üzvləri Çelikkırana qarşı fiziki güc tətbiq etmiş, ''Qalatasaray'' da bu işi məhkəməyə daşımaq qərarına gəlmişdi.
Bu prosesin növbəti iclası İstanbul Ədalət Sarayı 3-cü Əsliyə Cəza Məhkəməsində baş tutub. Bu dəfə prosesdə ''Fənər''in 3 futbolçusu - Ceyden Oostervolde, Mərt Hakan Yandaş, Mərt Müldür, eləcə də stadionun müdürü Əli Çelikkıran ilə vəkili iştirak edib. Zədə üzündən faktiki olaraq son mövsümü boşa verən niderlandlı Oostervolde məhkəmə önündə əvvəlcə aylıq gəlirinin 100 min avro olduğunu bildirərək bunları deyib:
''Həmin gün meydana qələbəni qeyd etmək üçün çıxdım. Meydanın mərkəzində şəkil çəkdirdiyimiz sırada bir nəfərin bayrağı əlimizdən almaq istədiyini fərq etdim. Sonra aləm bir-birinə dəydi. Nə olduğunu dəqiq xatırlamıram, amma mən heç kimə toxunmadım. Heç kimi vurmadım və təpik atmadım. Düzünü desəm, ümumiyyətlə nə üçün bura gəldiyimi bilmirəm. Həmin an meydanda çox insan var idi və kimin kimi vurduğunu xatırlamıram''.
Məhkəməyə zorla gətirilən isimlərdən olan ''Fənər''in digər müdafiəçisi Mərt Müldür isə şahid qismində ifadə verərək bunları deyib: ''Biz ora yalnız şəkil çəkdirmək üçün çıxmışdıq. Qarşı tərəfdən bir nəfər gəlib aqressiv şəkildə bayrağımızı endirməyə çalışdı. Həmin andan etibarən ortalıq qarışdı. Kimin kimə vurduğunu görmədim. Əli Çelikkırana da kimin vurduğunu görmədim. Şəkildə zatən 4-5 nəfər olduğumuz görünür. Olay yerində Əli Çelikkıranın olduğunu gördüm. Amma sonrasını xatırlamıram. Belə başa düşdüm ki, bayrağı məhz o, endirməyə çalışmışdı. Şəkil çəkdirənlər arasında mənimlə yanaşı Oostervolde, İrfan Can Eğribayat və o dönəmdəki baş həkimimiz Ərtuğrul da var idi''.
Prosesdə şikayətçi tərəf kimi çıxış edən Əli Çelikkıranın sözləri isə belə olub: ''Hazırda qarşı tərəfdə oturan Oostervolde həmin gün mənə zərbə endirdi və təpik atdı. Elə digərləri də mənə bir neçə zərbə endirdilər. Zatən əvvəlki ifadələrimdə də onlardan hansının mənə zərbə vurduğundan əmin olduğumu, hansından isə əmin olmadığımı demişdim''.
Məhkəmənin növbəti iclası sentyabrın 18-də keçiriləcək. Qeyd edək ki, ''Qalatasaray'' Oostervolde, Mərt Hakan Yandaş, Ərtuğrul Karanlık, Hulusi Belgü və Əmrə Kartalı qəsdən yaralama, İdman meydanında qeyri-etik davranışlar sərgiləmək, eləcə də idman bazasına zərər vurmaqda günahlandıraraq onların 2 il 3 aydan 6 il 9 aya qədər həbs cəzası almasını istəyir.
Digər xəbərlər
