“Fənərbaxça” ilə “Qalatasaray” arasındakı derbilər nadir hallarda qalmaqalsız ötüşür.

“Football-plus.az” xəbər verir ki, Budəfəki qarşılaşma da istisna olmadı. Bilindiyi kimi, bazar günü superliqanın 37-ci turunda “Fənər” əzəli rəqibini səfərdə minimal hesabla məğlub etdi. Əsas qalmaqallı hadisələr oyundan sonraya təsadüf etdi. Əslində final fitindən dərhal sonra heç bir qeyri-adi olay yaşanmadı. “Fənər”lilər polisin müşayiəti ilə qələbəni fanatlarının yer aldığı tribunanın önündə qeyd etdilər, sonra da sakitcə paltardəyişmə otağına yollandılar. Amma final fitindən təxminən bir saat sonra tribunaları, demək olar, boşaldılmış “Rams Park”a gözlənilmədən “Fənərbaxça” prezidenti Əli Koç gəldi! Oyunu televizordan izləməyə üstünlük verən Koç əlaltılarını yığaraq qələbəni qeyd etmək üçün birbaşa “düşmənin məbədinə” təşrif buyurdu. Bu azmış kimi, Koç stadiona ayaq basan kimi “Fənər”in oyunçularına paltardəyişmə otağından çıxaraq meydana qayıtmağı əmr verdi. Futbolçular da onun sözündən çıxmayaraq meydana qayıtdılar. Əsas həngamə də məhz bu zaman başladı. Əvvəlcə bomboş stadionda “Fənər”lilərin səsinin çox çıxmaması üçün musiqi qoşuldu. Amma bu, “Fənər”lilərə problem yaratmadı. İrfan Can Eğribayat və Mərt Hakan Yandaş başda olmaqla bəzi oyunçular meydanın mərkəzində toplaşaraq klubun bayrağı ilə şəkil çəkdirdilər. Həmin an stadionun rəsmilərindən biri qaça-qaça “Fənər”lilərə tərəf gələrək bayrağı onların əlindən almağa çalışdı. Bu məqamda tərəflər arasında əlbəyaxa dava başladı və aləm bir-birinə dəydi. “Fənər”lilərə mane olmağa çalışanlar arasında “Qalatasaray”ın baş katibi Eray Yazqan da yer aldı. Onunla Əli Koç arasındakı dialoq diqqəti çəkdi. Koç Yazqana barmağını sallayaraq “burdan çəkilməsən, döyüləcəksən” dedi. Həmin dava-dalaşda stadiona cavabdeh şəxslər ilə “Qalatasaray” başqanı Dursun Özbəyin sürücüsü xəsarətlər aldı. Daha bir maraqlı an Koçun öz sağ əli, “Fənər”in idarə heyətinin üzvü Səlahəttin Bakinin yaxasından yapışaraq ona “mən sus dedikdə susmalısan” deyərkən yaşandı. Daha sonra Koç “işimiz bitdi, gedə bilərik” dedi. Olaylar dəhlizdə və “Fənər”lilər avtobusa minərək stadiondan ayrılana qədər davam etdi. Dünən Dursun Özbək mətbuat konfransı keçirərək Əli Koça “od püskürdü”. O, Koçun bu olaylara görə bir-bir cavab verəcəyini və qalmaqala səbəb olanlardan məhkəmnəyə şikayət edəcəklərini bildirdi. Özbəyin sözlərinə görə, Koç bütün bunları seçkiqabağı reytinq qazanmaq üçün, yəni şou xətrinə etdi. Xatırladaq ki, “Fənər”də iyunun əvvəlində prezident seçkisi keçiriləcək.