Bazar günü keçirilən derbinin ardından qalmaqallı olayların yaşandığını xəbər vermişdik.

“Football-plus.az” xəbər verir ki, xatırladaq ki, “Fənərbaxça”nın “Qalatasaray”a səfərdə minimal hesabla qalib gəldiyi görüşün final fitindən təxminən 70 dəqiqə sonra “Fənər”in başqanı Əli Koç bir neçə köməkçisi ilə birlikdə sürpriz şəkildə “Rams Park”a gəlmiş və qələbəni futbolçularla birlikdə çılğın şəkildə qeyd etmişdi. Həmin vaxt “Qalatasaray”ın baş katibi Eray Yazqan, stadionun müdirü Əli Çelikkıran, eləcə də başqan Dursun Özbəyin sürücüsü meydanın mərkəzində “Fənər”in bayrağı ilə şəkil çəkdirən futbolçulara mane olmağa çalışmış və tərəflər arasında çox ciddi çaxnaşma yaşanmışdı. “Qalatasaray”ın şikayətindən sonra İstanbul valiliyi bu məsələni araşdırmağa başlayıb. Valilikdən bununla bağlı rəsmi açıqlama verilib. Qalmaqalda işitirak edən bütün şəxslər müəyyənləşdirilib. Onların hamısının ifadəsi alınacaq. Onların arasında baş məşqçi İsmayıl Kartalın oğlu Əmrə Kartal, “Fənər”in sabiq yönəticisi Hulusi Belgü, eləcə də iki futbolçu – Mərt Hakan Yandaşla Osayi-Samuel də yer alacaq. Əli Koç prezident seçiləcəyi təqdirdə onun yeni idarə heyətində yer alacağı gözlənilən Hulusi Belgünün Əli Çelikkıranın saçından tutaraq onu yerə yıxdığı güman edilir. “Qalatasaray”dan başqa klubun baş katibi Eraq Yazqan özü də konkret Əli Koçla “Fənər”in yönəticisi Səlahəttin Bakidən məhkəməyə şikayət edib. Yazqan məhkəməyə verdiyi şikayət ərizəsində bu ikilinin onu təqhir və təhdid etdiyini vurğulayıb.

Bu arada bir məsələ də sosial şəbəkələrdə geniş müzakirə doğurub. Belə ki, Əli Koça Nizam-İntizam Komitəsi (NİK) tərəfindən mayın 9-da 60 günlük cəza verilmişdi. Yəni o, 60 günlüyə səlahiyyətlərini icra etməkdən məhrum olunmuşdu. Bu həm də o deməkdi ki, Koçun iki ay ərzində stadionlara daxil olmaq hüququ yox idi. Amma reallıq başqa cür imiş. Sən demə, NİK-ə para ödəməklə bu cəzadan qurtulmaq mümkün olurmuş. Bunun qiyməti 15 min lirə imiş. Əli Koç da ümumi məbləği ödəyərək cəzadan qurtulubmuş. Yəni onun stadiona daxil olmasının qarşısında heç bir maneə yox imiş. Deyilənə görə, Türkiyə Futbol Federasiyası bu qanunu dəyişmək istəyir. Yəni bundan sonra pul ödəməklə cəzadan qurtulmaq mümkün olmayacaq. Sonda onu da vurğulayaq ki, “Rams Park”dakı qalmaqalla bağlı 7 nəfər NİK-ə sövq edilib. “Fənərbaxça”dan Əli Koç, Səlahəttin Baki, İrfan Can Eğribayat, Ceyden Oostervolde, Mərt Hakan Yandaş, Əmrə Kartal və klubun baş həkimi Ərtuğrul Karanlık, “Qalatasaray”dan isə təhlilçi Sərhat Doğan cavab verməli olacaq.