Futbol üzrə ölkə çempionatının 2-ci liqasında mövsümün qəhrəmanı “Şahdağ Qusar”dı.

Qusarlılar bu mövsüm heç kimə uduzmadılar. Onlar 23 qələbə qazandılar və yalnız üç dəfə heç-heçə ilə kifayətləndilər. Srağagün Binə qəsəbə stationunda komandaya çempionluq kuboku təqdim olundu. Biz isə baş məşqçisi Elnur Abdullayevlə söhbətləşdik.

- Mövsümdən əvvəl bu nəticəni gözləyirdizmi?
- İlk növbədə bu möhtəşəm çempionluq münasibətilə klub rəhbərliyinə, futbolçularıma, azarkeşlərimizə və bizə dəstək olan hər kəsə dərindən təşəkkürümü bildirirəm. Düzünü desəm, hələ mövsüm başlamamış qarşıya məqsəd qoymuşduq. İlk gündən uşaqlara da dedim ki, məqsədimiz yalnız 1-ci liqaya çıxmaq yox, çempion kimi çıxmaqdı. Allaha şükürlər olsun, bu yolda birlikdə mübarizə apardıq və nəticə də qazandıq. Heç vaxt liderliyi əldən vermədik. Bu özü-özlüyündə böyük uğurdu.

- Klub rəhbərliyinin və azarkeşlərin bu prosesdə dəstəyi necə oldu?
- Klub rəhbərliyi maddi və mənəvi baxımdan yanımızda oldu. Onlara söz verdim. Heç vaxt qorxmuram, çətin işləri çox sevirəm. Futbolçu vaxtı da qorxaq olmamışam. İşi öz öhdəmə götürdüm və sözümün arxasında durdum. Məğlubiyyətsiz çempion olduq. Bir daha rəhbərliyə təşəkkürümü bildirirəm. Azarkeşlərin bizi dəstəkləməsi möhtəşəm idi. Bəziləri normal şəkildə oyunlara izləyici kimi baxır. Bizim dəstəkçilər yaxşı və pis şeyləri unutmur. Onları ürəkdən təbrik edirəm. Dəstək olduqları üçün minnətdarlıqımı bildirirəm. Bir ailə olduq. Bu işdə ailə olmadınsa, uğur əldə etmək şansın da yoxdu. Futbolçularla azarkeşlər arasında sevgi oldu.

- Bəs növbəti mövsüm üçün əsas hədəfiniz nədi?
- Rəhbərliklə görüş olacaq. Həmin görüşdə yeni mövsümlə bağlı müzakirə aparılacaq. Onda sizə nəsə deyə bilərəm. Danışıqlardan sonra məlumat verəcəm.

- Bu mövsüm məşqçi kayeranızda hansı yeri tutacaq?
- Məşqçi karyeram uğurlu alındı. Axırıncı yox, axarıncı olsun. Mən bu uğurla kifayətlənmirəm. Daha çox çalışmaq, yenilikləri öyrənmək lazımdı. Faydalı məşqçi olmaq istəyirəm. Bunu zaman göstərəcək. Uğurları davam etdirmək lazımdı.

- “Şahdağ Qusar”ın uğuru Qusar futbolu üçün nə ifadə edir?
- “Şahdağ Qusar” tarixi olmuş komandadı. Səhv etmirəmsə, bu il 75 illiyidi. Tarixində ilk dəfə kubok qazandı. Azarkeşlər və biz xoşbəxtik. İnşallah, kubokların davamı gələr.

- Mövsümboyu komandanın motivasiyasının yüksək saxlamaq çətin olmadı ki? Xüsusən artıq çempionluq yaxınlaşanda?
- Mövsümün ilk yarısı təzyiq baxımından nisbətən rahat keçdi. Amma ikinci dövrədə təzyiq özünü göstərdi. Məşqçi üçün ən çətin şeylərdən biri budu - məğlub olmayan komandada futbolçuların arxayınlaşma mərhələsinə keçməsinin qarşısını almaq. Mən hər oyundan sonra futbolçularla danışdım, motivasiyanı yüksək tutmağa çalışdım. Dedim ki, rahatlaşmaq olmaz və çox şükür, bu mesajı qəbul etdilər. Rəqiblər də bizə qarşı çox fərqli oynayırdı. Lider komandaya qarşı çıxan hər futbolçu özünü göstərmək istəyir. Onların da məqsədi olur: “lideri büdrədək”. Amma biz büdrəmədik. Sonda çempion olduq. Deyə bilərəm ki, bu, layiqli çempionluqdu. Mənimlə bu yolda olan hər kəsə sonsuz təşəkkür edirəm.

ƏSƏD SEYİDOV