“Mövsümün sonunda rəhbərliklə danışıq olacaq və qərar veriləcək” – 1-ci liqanın yeni sakini
Futbol üzrə ölkə çempionatının 2-ci liqasında mübarizə aparan “Şahdağ Qusar” 20-ci turda “Hypers Quba” üzərində qazandığı 2:1 hesablı qələbə ilə 1-ci liqaya vəsiqəni təmin etdi. Şimallılar 20 turdan sonra 58 xalla 1-ci pillədə qərarlaşıb.
1-ci liqada hədəf nə olacaq? Komandanı gücləndirməyi qarşıya məqsəd qoymusuzmu?
“Şahdağ Qusar”ın baş məşqçisi Elnur Abdullayev “Football-plus.az”ın bu suallarını cavabladı:
“Komandamız 1-ci liqaya vəsiqə qazandı. Futbolçuları, rəhbərliyi və azarkeşləri ürəkdən təbrik edirəm. Şükürlər olsun ki, qarşıma qoyulan məqsədə çatdıq. İnşallah, mövsümün sonunda çempionluğu da əldə edərik. 1-ci liqada hədəfin nə olacağını demək tezdi. Mövsümün sonunda rəhbərliklə danışıq olacaq və qərar veriləcək. “Hypers Quba” ilə oyunda sevinən tərəf biz olduq. Futbolçularımın göstərdiyi oyundan razı qaldım. Bu qələbə bizə çox lazım idi”.
ƏSƏD SEYİDOV
