Bu gün “Sports.az Awards" layihəsi üzrə 2024-25 futbol mövsümünün qaliblərinin mükafatlandırılma mərasimi keçirilib.

"Mövsümün ən yaxşı azərbaycanlı futbolçusu" nominasiyasının qalibi Mahir Emreli olub.

"Football-plus.az" xəbər verir ki, 28 yaşlı futbolçu mərasimdən sonra jurnalistlərin suallarını cavablandırıb.

- Düşünürəm ki, bu mükafatı təkcə vurduğum qollara görə yox, həm də susqunluğuma görə aldım. Mənə bu mükafatı layiq görənlərə təşəkkür edirəm. Baxmayaraq ki, bəzən uğurlarımı görməzdən gəldilər. Sizi sizə şikayət edirəm (gülür).

- Mövsüm ərzində xətrinə nə dəyib ki, jurnalistlərdən şikayətlənirsən?
- Yox, kiminsə xətrinə dəymək istəmirəm. Bu bir zarafat idi.

- Podkastlarda müzakirə edəndə deyirik ki, Mahir bir əvvəldə yaxşı olur, bir də axırda. Boşluqlar haqda nə düşünürsən?
- Düzü, əvvəllər bu haqda çox düşünürdüm. Ancaq indi başa düşürəm ki, məndən daha çoxunu gözləyirlər. Özümə bu yolla motivasiya verirəm. Bunu qəbullanandan sonra daha yaxşı oynamağa başladım.

- Yeni komandan bəllidi?
- Hələ ki yox. Yəqin ki, qarşıdakı həftələrdə bəlli olacaq. Ən gec milli fasilədən sonra...

- Hədəfin bundesliqadı?
- Məqsədim "TOP-5" liqada çıxış etməkdi. Ölkədən bu niyyətlə çıxmışdım. Qismət...

- Başqa ölkələrdən də təklif var?
- Rəsmi təklif olmadığı üçün kimisə ümidləndirmək istəmirəm. Sadəcə, agentlərimin mənə dediyinə görə, bəzi klublardan böyük maraq var.

- Belə düşünənlər var ki, Miroslav Kloze böyük məşqçi deyil. Bu üzdən Mahirin potensialından yararlana bilmir.
- Kloze, səhv etmirəmsə, məşqçiliyə iki-üç ildi başlayıb. Zamanla peşəsinə uyğunlaşacaq. Mən öz arzularımdan danışanda, o da öz istəklərini deyib. Məni sevindirən o oldu ki, bəzi anlarda anşala bilməsək də, peşəkarlıq gördüm. Şəxsi münasibət işə qarışmadı. Hücumçu kimi də onunla işləmək mənə ayrı motivasiya idi. Bəzən məndən onun kimi oynamağımı istəyirdilər (gülür). Lakin biz ayrı cür hücumçularıq. Onunla çalışdıqdan sonra həlledici zərbələrimi yaxşılaşdırdım. Ayrılanda onun da kövrəldiyini gördüm. Sağollaşanda mənə dedi ki, səninlə çalışmaq çox xoş idi. Mən də dedim ki, azərbaycanlı futbolçunun sizin kimi əfsanə ilə işləməsi ancaq yuxu kimi idi.

MÜZƏFFƏR QULUZADƏ