Mahir Emreli rəsmən “Konyaspor”un üzvüdü. Millimizin hücumçusu artıq yeni komandasında məşqlərə də başlayıb.

Oyunçunun keçidi ilə bağlı bütün detalları diqqətinizə çatdırmışıq. İndi qalır onun qardaş ölkədə özünü yaxşı tərəfdən göstərməsi. Görəsən, bu baş verəcək? Mahir Emreli Türkiyədə yaxşı performans sərgiləyə biləcək? Superliqada oynamaq futbolçu üçün çətin olmayacaq? Bu yöndə suallar çoxdu. Əvvəlcə onu deyək ki, hər şey Mahirin özündən asılıdı. O, Türkiyədə kral da ola bilər, sıradan biri də. Onu hansı çətinliklər gözlədiyini vaxtilə Türkiyədə legioner həyatı yaşayan azərbaycanlı futbolçulardan soruşduq.

İlqar Qurbanov football-plus.az saytına belə dedi:

“Nə deyim, vallah. Xeyirli-uğurlu olsun! Uzun fasilədən sonra daha bir azərbaycanlı futbolçu Türkiyədə, amma superliqada çıxış edəcək. Bu sevindirici haldı. Lakin heyf ki, yaxşı vaxtda getmədi. Həm Türkiyədəki zəlzələni, həm də “Konyaspor”un indi yaxşı səviyyədə olmamasını nəzərdə tuturam. Amma klub kimi çox yaxşı yerə getdi. Hamı bilir ki, superliqa dünyanın ən çətin çempionatlarından biridi. Burda hər komandada ən azı 3-4 hücumçu olur. Forvard iki-üç oyun etimadı doğrultmayanda onu “gözdən çıxarırlar”. Superliqa belə bir çempionatdı. İşi çox çətin olacaq. Amma Mahirdə potensial var. Mən ona inanıram. Əsas məsələ potensialını açmasıdı”.