Azər Bağırovun sirli ayrılığının gizlinləri - klub rəhbərliyindən şok etiraflar!
Onsuz da Misli premyer-liqasının sonuncu - 36-cı turu çərçivəsində keçirilən "Turan Tovuz" - "Kəpəz" matçı Qərb derbisi statusu daşıdığı üçün futbol ictimaiyyətinin diqqətində idi. Ancaq hakimin start fitindən sonra baş verən qəribə hadisələr prinsipial qarşılaşmaya olan marağı birbəbeş artırdı. Ona görə ki, "Turan Tovuz" ilk 44 dəqiqə ərzində Gəncə təmsilçini 4:0 hesabıyla məğlub duruma saldı.
Ardından, daha dəqiqi, hələ oyun başa çatmamış "Kəpəz"in baş məşqçisi Azər Bağırovun matçdan sonra istefa verəcəyi haqda xəbərlər yayıldı. Əlbəttə, bunun doğru olub-olmadığını anlamaq üçün gözləmək daha məqbul variant idi. Lakin "sarı-göylər"in ruhsuz oyunu fonunda mütəxəssisin qəmgin duruşuna diqqət yetirmək kifayət idi ki, bir qədər sonra veriləcək açıqlamanın mahiyyətini öncədən hiss edəsən.
İstənilən halda, Azər bəy məlum qərarını qəribə fikirlərlə izah etdi və "sarı-göylər"lə bağlı missiyasının bitdiyini elan etdi. Maraqlıdı ki, o, mətbuat konfransında rəhbərliklə şərtlərinin üst-üstə düşmədiyini də dedi, klubda bundan sonra hər şeyin yaxşı olacağını da. Bağırov bir-birinə zidd açıqlamalar verməklə yanaşı, ortaq məxrəcin tapılmadığı məsələləri ictimaiyyətdən gizlətdi. Və gedərkən "Kəpəz"in yeni rəhbərliyinin “bostanına daş atmaqdan” da çəkinmədi: "Zaman göstərəcək ki, kim hardadı? Həmişə demişəm ki, həyatda düz olmaq lazımdı".
Bəli, ad çəkməsə də, Azər bəyin dediklərindən hansısa nəticə çıxarmaq mümkündü. Bəs klub rəhbərliyinin bu istefa ilə bağlı mövqeyi necədi? Bu sualla "sarı-göylər"in idman məsələləri üzrə müşaviri Erkin İbrahimova müraciət etdik:
"Azər müəllimin açıqlamalarından xəbərdarıq. Nə deyibsə, biz də qatılırıq. Məqsədimiz onunla yola davam etmək idi. Ancaq son anda bir neçə mövzuda fikrimiz üst-üstə düşmədi. Gələcəyə baxmalıyıq. Artıq yeni baş məşqçi axtarışına başlamışıq. Bu barədə yalnız bir məqam bəllidi: yeni çalışdırıcı əcnəbi olmayacaq. Həmçinin həmin mütəxəssislə fikrimiz üst-üstə düşməlidi. Biz növbəti mövsüm akademiyaya üstünlük verəcəyik. Yəni əsas maliyyə gəncəli futbolçuların yetişdirilməsinə ayrılacaq. Əsas komanda ilə bağlı hədəf isə builkindən daha yaxşı nəticə əldə etmək olacaq. Əlbəttə, gəncəli azarkeşlərin arzusu daha böyükdü. Ancaq ilk ildən avrokuboklara yollanmaq hədəfi çətin işdi. Düzü, büdcəmiz təsdiqlənməyib. Baş məşqçimiz bəlli olandan sonra əsas komandanın hədəfləri haqda daha dəqiq danışa biləcəyik. O dəqiqdi ki, növbəti mövsüm üçün maliyyəmiz avrokuboklara yollanmaq uğrunda mübarizə baxımından yetərli olmayacaq. Qısası, mərhələli iş görmək istəyirik. Gəncə son illərdə hansı futbolçunu ölkəyə qazandırıb? Səhv etmirəmsə, sonuncu belə oyunçu Mahmud Qurbanov olub. Hər halda, bizim baxış bucağımız fərqlidi. Akademiyaya əcnəbi əlaqələndirici təyin etmək və bu yöndə planlara köklənmək istəyirik".
KƏNAN BAHADIR
Digər xəbərlər
