Bu gün Misli premyer-liqasında 3-cü tur start götürüb.

Turun ilk oyununda "Kəpəz" "Turan Tovuz"u qəbul edib. "CBC Sport" bu oyunu canlı yayınlayıb.

Misli premyer-liqası
1-ci dövrə, 3-cü tur
16 iyul
Kəpəz (Gəncə) - Turan Tovuz 0:2
Martin Petkov, 18. Belajdi Pusi, 21.
"Kəpəz"in bu rəqiblə ev oyunlarının balansı: 2:+1=1-0, 1:0.
2022/23 - 0:0, 1:0.
Cəzalı: Elmir Tağıyev (Kəpəz).
"Futbol+"in proqnozu: 40-30-30.
Gəncə. Şəhər stadionu. Saat 17.00.

Futbol həftəsi möhtəşəm görüşlə başlayacaq. Mövsümün ilk Qərb derbisi Gəncədə keçiriləcək. Bu oyunda konkret favorit yoxdu. Düzdü, "boz qurd" "transfer pəncərəsi" zamanı heyətini yetərincə yaxşı futbolçularla gücləndirdi. Ümumiyyətlə, Tovuz təmsilçisində böyümə və inkişaf öz sürəti ilə davam edir. Lakin 2-ci turda "Qarabağ" önündəki darmadağın Ayxan Abbasov üçün siqnal olmalıdı. Tovuzlular yaxşı təşkilatlanmış, öz oyun fəlsəfəsi olan rəqiblərə müqavimət göstərə bilmir.

"Kəpəz"də isə vəziyyət fərqlidi. Gəncəlilər həm stadion, həm də maliyyə problemi yaşayır. Buna baxmayaraq, Azər Məmmədovun komandası yaxşı oyun sərgiləyir. "Sarı-göylər" ilk iki turda "Neftçi"ni evdə məğlub edib (1:0), "Zirə"yə səfərdə uduzub - 0:1.

Yuxarıda qeyd etdiyimiz kimi, bu görüşdə konkret favorit olmasa da, üstünlük "Kəpəz"dədi. Oyunun Gəncədə keçirilməsi Məmmədovun komandasının əlini gücləndirir. Ümumiyyətlə, bu mövsüm "Kəpəz"i doğma meydanda məğlub etmək çox çətin olacaq.

Bu komandalar indiyə kimi 4 dəfə üz-üzə gəlib. Bu görüşlərin ikisində tovuzlular, birində gəncəlilər qələbə qazanıb. Bir matçda isə qalib müəyyənləşməyib. Topların nisbətində də "boz qurd" öndədi - 4:1.