İspaniyanın yeni çempionu “Barselona”da müqavilələrin yenilənməsi prosesinə start verilib. Artıq baş məşqçi və aparıcı futbolçulardan biri ilə yeni sözləşmə rəsmiləşib.

Hans-Diter Flik formallığı aradan qaldırıb. Baş məşqçinin “Barselona” ilə müqaviləsini yeniləyəcəyi gözlənilirdi. İspaniya klubunun mətbuat xidmətinin məlumatına görə, almaniyalı mütəxəssislə imzalanan yeni sözləşmənin müddəti 2027-ci ilin yayına qədərdi. Bundan əvvəlki müqavilə isə növbəti mövsümün sonunda qüvvədən düşəcəkdi. Flik “Barselona”ya cari mövsüm ərəfəsində təyin olunub. O, komandanı La Liqa, İspaniya kuboku və İspaniya Superkubokunda qələbəyə daşıyıb.

Nəhayət, Rafinyanın məsələsi həllini tapıb. “Barselona” rəhbərliyi braziliyalı vingerlə müqavilənin müddətini 2028-ci ilin yayına qədər uzadıb. Bu, Fliklə imzalanan yeni sözləşmədən sonra baş verib. Rafinyanın əvvəlki müqaviləsinin müddəti 2027-ci ilin yayına qədər idi. O, bu mövsüm “Barselona”nın heyətində 56 oyunda meydana çıxıb, 34 qol vurub və 25 məhsuldar ötürmə verib.
Lamin Yamal da tezliklə müqaviləsini yeniləyəcək. Bu barədə tanınmış insayder Nikolo Skira məlumat yayıb. O, yeni müqavilənin müddətinin 2030-cu ilə qədər nəzərdə tutulacağını xəbər verib. 17 yaşlı futbolçunun illik maaşı 9 milyon avroya bərabər olacaq, Lamin bir sıra bonuslara görə qazancını daha da artıra bilər. Məlumatda onun maaşının 18 milyon avroya çatana qədər ildən-ilə artacağı da bildirilir.

Yeri gəlmişkən, Lamin İspaniya çempionatının cari mövsümündə 34 oyun keçirib, 9 qol vurub və 13 məhsuldar ötürmə edib. İspaniyalı futbolçunun Çempionlar Liqasında meydana çıxdığı 13 matçda 5 qolun və 3 məhsuldar ötürmənin müəllifi olduğunu da xatırladaq.