Hər turun öz taleyi, hər oyunun isə gizli dramı var. Çempion, 2-ci yerin sahibi, elitadan gedən komanda buna qədər artıq müəyyənləşmişdi. Ancaq 35-ci tur da bəzi suallara aydınlıq gətirdi. 3-cü yerin də, 4-cü yerin də sahibi bəlli oldu. Və indi ortada 5-ci pilləyə can atan “Neftçi” var.

Şənbənin üç oyunu eyni vaxtda başladı. 3-cü yerin əlçatmaz olduğunu anlayan “Turan Tovuz”, heç olmasa, 4-cü yeri tutmaq istəyirdi ki, bu mənada “Sumqayıt”la səfər oyunu yerinə düşdü. Təbii ki, Kurban Berdıyev debüt mövsümündə mükafatçılar sırasına düşmək istəyirdi. Amma iş elə gətirdi ki, 4-cü yer də onu və komandasını Avropaya daşıya bilər. Bunun üçün sadəcə, “Qarabağ”a dua etmək lazımdı. Daha doğrusu, “Qarabağ”ın kubokun finalında “Sabah”ı məğlub etməsinə. Öz aramızdı, dua məsələsində “Turan Tovuz” da tək deyil. Elə “Zirə” də məhz ağdamlıların kuboku qazanmasını arzulayır ki, Avropa Liqasında oynaya bilsin.

“Zirə” – “Sabah” oyununun heç bir turnir əhəmiyyəti yox idi. Nə “qartallar” üçün 2-ci yeri tərk etmək təhlükəsi var idi, nə də “bayquşlar”ın 4-cü pilləyə yüksəlmək şansı. Odu ki, hər tərəf gücünü qorudu, məhsuldar heç-heçədən razı qaldı. “Sabah”ın futbolçuları cismən meydanda olsalar da, ruh etibarı ilə artıq çoxdan kubokun finalındadılar. Vasili Berezutski indi yalnız futbolçularını formada saxlamağa çalışır.

Nəhayət, “Araz-Naxçıvan”ın da düşərgəsində toy-bayramdı. Ən azı paltardəyişmə otağından çəkilən fotolar komandanın çoxdan bu uğurun həsrətini çəkdiyini göstərir. Hələ biz Naxçıvan küçələrində 3-cü yer və avrokuboklara vəsiqə münasibəti ilə təşkil olunan yürüşü demirik. Bir sözlə, Şamaxıdan qələbə ilə qayıdan “qırmızı-ağlar” Zaur Axundovu avrokubok arzusuna çatdırdı. Bir “qaçqın” komanda, yəqin ki, maksimu elə bunu bacarardı.

Turun son iki oyunu bazar günü keçirildi. “Neftçi” sanki mövsümoyu içində yığılan qəzəbi, ağrı-acını tökməyə yer, daha doğrusu, rəqib axtarır. “Səbail”lə oyun tam yerinə düşdü. “Ağ-qaralar” “dənizçilər”i darmadağın etməklə növbəti rəqibə - “Sabah”a da özünəməxsus mesaj göndərdi. Axı bu komandaların kubokda da yolu kəsişib, “bayquşlar” “Neftçi”nin Avropaya yolunu ağlayıb. Odu ki, həmin haqq-hesabı çürütmək və 5-ci yeri qoparmaq üçün vaxt-vədə yetişib.

Turun son oyununda köhnə-yeni çempion “Qarabağ” “Kəpəz”i qəbul etdi. Artıq turnir hədəfinin öhdəsindən gələn gəncəlilərin məğlubiyyətlə barışmaqdan başqa yolu var idi? Bizə elə gəlir ki, yox. Cari mövsümdə nadir hallarda “Qarabağ”ın ev oyununa bu qədər çox azarkeş toplaşır. İnsafən, Qurban Qurbanov və komandası da bu oyuna tam ciddi yanaşdı, rəqibə laqeydlik, nəticəyə görə məsuliyyət hiss etməmək kimi zərərli vərdişlər görmədik. Azər Bağırov oyundan sonra hər nə qədər gileylənsə də, premyer-liqa rinqinə fərqli çəki dərəcələrində olan boksçular çıxmışdı.

Çox güman, “Kəpəz” də islahatlar dalğasından sonra “çəki dərəcəsini dəyişəcək”. Amma indi güclü rəqibi alqışlamaqdan, məğlubiyyətlə barışmaqdan başqa yol yoxdu!

Misli premyer-liqası 
4-cü dövrə, 35-ci tur
17 may
Sumqayıt - Turan Tovuz 0:1
Zirə - Sabah 1:1
Şamaxı - Araz-Naxçıvan 0:1
18 may
Neftçi - Səbail 3:0
Qarabağ - Səbail 3:0

ƏSƏD SEYİDOV