32-ci turda çempion, 33-cü turda 2-ci yerin sahibi bəlli olmuşdu.

Hadisələrin məntiqi axarına əsaslansaq, 34-cü turda da 3-4-cü yerlərin sahibləri bilinməliydi. Bunun üçün sadəcə, “Araz-Naxçıvan”la “Turan Tovuz”un xal qazanması lazım idi. Amma ikisi də uduzdu, bu üzdən son iki tur üçün kiçik intriqa qaldı. Təbii ki, naxçıvanlılar son turlarda ən azı 1 xal qazanacaq, təbii ki, tovuzlular da 4-cü yeri “Sabah”a verməyəcək. Yenə də son iki turun nəticələrini gözləməliyik.

Turun ilk oyununda “Sabah” inamlı qələbə qazandı. Bu gün nə “bayquşlar”ın hansısa motivasiyası var, nə də “Şamaxı”nın. Amma Vasili Berezutski bütün oyunlara kubokun baş məşqçi, futbolçularını formada saxlamaq vasitəsi kimi baxmağa məcburdu. “Şirlər”lə qarşılaşma bu mənada vəziyyətin heç də pis olmadığını göstərdi.

“Zirə” yenə üslubuna sadiq qaldı. “Qartallar” rahatca “Səbail”i məğlub etməklə 1-ci liqaya göndərdi. Əslində “dənizçilər”in elitada qala bilməyəcəyi çoxdan – hələ Cavid Hüseynov “üsyan bayrağı açıb” gedəndə bəlli idi. Mayın 10-da çoxdan gözlənilən qətl reallaşdı. “Səbail” 2017/18 mövsümündən daimi sakini olduğu elita ilə vidalaşdı. Təbii, 1-ci liqaya yuvarlanmaq dünyanın sonu deyil. Axı klubun müəyyən infrastrukturu, maliyyə gücü var. “Keçmiş olsun” deyib, elitaya dönmək üçün işə başlamaq lazımdı.

Şənbənin digər oyununda “Turan Tovuz” evdə “Neftçi”yə uduzdu. Nə qədər inandırıcı olmasa da, bəlkə də bu qələbə “ağ-qara” camiəyə müəyyən inam, güvən bəxş edəcək. Tovuzluların işi isə Allaha qalıb, daha doğrusu, onların “Qarabağ”ın kuboku qazanması üçün dua etməkdən başqa yolu yoxdu. Açıq-aşkar görünür ki, komanda 4-cü yerlə barışıb, özünəməxsus psixoloji böhran, doymuşluq kompleksi yaşayır. Məhz belə məqamlarda baş məşqçinin bacarığı önə çıxmalıdı. Düzünə qalsa, biz Kurban Berdıyevdən lazımi canfəşanlığı görmürük.

Bazar günü turnir cədvəlinin aşağı hissəsində yerdəyişmə baş verdi. “Kəpəz” qalmaqalla bitən oyunda “Sumqayıt”ı məğlub etməklə bir pillə irəlilədi. Necə deyərlər, yeni sponsorun gəlişi düşərli oldu. “Sumqayıt” isə elitada qalacağı bəlli olandan sonra mövsümü yola verməklə məşğul idi. Odu ki, yetirmələrini yeni uğurlara səsləyə bilməyən Vaqif Cavadovun istefaya göndərilməsi təəccüb doğurmadı.

“Qarabağ”la “Araz-Naxçıvan”ın duelləri ətrafında müəyyən prinsipiallıq yaranmışdısa da, rüşeym mərhələsində boğuldu. Niyə belə deyirik? Çünki heç bir turnir hədəfi qalmayan ağdamlılar “qırmızı-ağlar”ı oynaya-gülə, heç bir şans vermədən məğlub etdi. Bir qədər əvvəl “Turan Tovuz” haqda işlətdiyimiz ifadələri “Araz-Naxçıvan”a da aid etmək istəyirik. Komanda artıq bu mövsüm üçün işini bitmiş sayır, nəticəyə zərrəcə önəm vermir, sanki nəyisə gözləyir. Gözlənilən avrokubok sınağı ərəfəsində heç də yaxşı əlamət deyil.

Misli premyer-liqası
4-cü dövrə, 34-cü tur 
9 may 
Sabah - Şamaxı 3:1
10 may 
Səbail - Zirə 0:1
Turan Tovuz - Neftçi 1:2
11 may
Kəpəz - Sumqayıt 1:0
Qarabağ - Araz-Naxçıvan 2:0

1. Qarabağ 34 26 5 3 82-19 83
2. Zirə 34 22 4 8 57-26 70
3. Araz-Naxçıvan 34 14 13 7 33-28 55
4. Turan Tovuz 34 12 13 9 40-39 49 
5. Sabah 34 9 17 8 48-45 44
6. Neftçi 34 9 13 12 36-48 40 
7. Şamaxı 34 9 9 16 32-44 36
8. Kəpəz 34 8 8 18 28-58 32
9. Sumqayıt 34 8 6 20 27-51 30
10. Kəpəz 34 4 10 20 27-52 22

Bombardirlər: Leandro Andrade (Qarabağ) - 14, Salifu Suma (Zirə) – 12, Davit Volkov (Zirə) - 11, Cesse Sekidika (Sabah) - 10.

Növbəti turun oyunları mayın 17-18-də keçiriləcək: “Sumqayıt” - “Turan Tovuz”, “Zirə” - “Sabah”, “Şamaxı” - “Araz-Naxçıvan”, “Neftçi” - “Səbail”, “Qarabağ” - “Kəpəz”.

ƏSƏD SEYİDOV