“Turan Tovuz” 4-cü yeri də əldən verəcək?
Misli premyer-liqasında 34-cü turdan sonra “Turan Tovuz” 49 xalla 4-cü, “Sabah” isə 44 xalla 5-ci yerdə qərarlaşıb.
Tovuzlular son iki turda “Sumqayıt” və “Kəpəz”lə, “bayquşlar” “Zirə” və “Neftçi” ilə üz-üzə gələcək. Kurban Berdıyevin komandası son turlarda elə inamsız təsir bağışlayır ki, hətta 4-cü yerin də əldən çıxmaq ehtimalı var.
Görəsən, bu ehtimal nə dərəcədə realdı? Bu sualı təcrübəli mütəxəssis Aslan Kərimova ünvanladıq:
“Bunu demək çətindi. Bu komandaların “Turan Tovuz”a qalib gəlməsi çətindi. “Sabah”ın “Zirə” və “Neftçi” ilə oyunları gərgin keçəcək. Üstəlik “bayquşlar” iki cəbhədə mübarizə aparır, ilk növbədə kubokun finalını düşünürlər. “Zirə” ilə matç böyük mənada heç bir əhəmiyyət kəsb etmir. “Neftçi” “Sabah”a qalib gəlmək istəyəcək. “Sabah” isə kubok oyununu düşünməli olacaq. Bütün bunlar “Turan Tovuz”u “Sabah”dan daha üstün duruma gətirir. Məncə, “Turan Tovuz” mövqeyini “Sabah”a verməməlidi. Amma hər şey baş verə bilər”.
ƏSƏD SEYİDOV
Digər xəbərlər
