“Kristal Pelas” ilk titulunu qazandı - İCMAL
final
Kristal Pelas – Mançester Siti 1:0 (1:0)
Kristal Pelas: Henderson, Riçards, Lakrua, Qehi (Lerma, 61), Minyos, Uorton (Hyuz, 87), Kamada, Mitçell, Sarr, Eze, Mateta (Nketia, 78).
MS: Orteqa, Akanci, Diaş, Qvardiol, O’Rayli, B.Silva (Gündoğan, 88), De Bruyne, Savinyo (Foden, 76), Marmuş (Eçeverri, 76), Dokyu, Holann.
Qol: Eze, 16.
Marmuş 36-cı dəqiqədə penaltidən yararlana bilməyib (qapıçı).
Vərəqələr: O’Rayli, 66. B.Silva, 75. Diaş, 83. De Bruyne, 85. Henderson, 90+1. Eçeverri, 90+5 – sarı.
Hakim: Stüart Attuell.
17 may. London. 84163 tamaşaçı.
Dünyanın ən qədim turnirinin finalı ənənəvi olaraq “Uembli”də keçirildi.
Təbii ki, “Kristal Pelas” – “Mançester Siti” duelinin favoriti “şəhərlilər” idi. Onlar dərhal təşəbbüsü ələ aldı, Henderson qan-tər içində çalışdı. “Qartallar”ın qapıçısı əvvəlcə Holannın baş zərbəsini qaytardı, ardından Qvardiolun künc zərbəsindən asmanı tamamlamasına imkan vermədi.
Rəqibin start təzyiqini dəf edən londonlular 16-cı dəqiqədə gözlənilmədən irəli çıxdı. Munyosun asmasından sonra Eze qapının aşağı küncünü “nişan aldı”. “Qartallar” bununla kifayətlənmədi, 2-ci qolun axtarışına çıxdı. Sarrın zərbəsindən sonra Orteqa komandasını xilas etdi. “Şəhərlilər”in təzyiqi isə 36-cı dəqiqədə penaltiyə səbəb oldu. Bernardo Silvaya qarşı kobudluğa görə təyin olunan penaltini əvvəlcə Holann yerinə yetirmək istəsə də, sonradan Marmuş məsuliyyəti boynuna götürdü və Hendersonla dueldən məğlub ayrıldı.
MS fasilədən sonra da təzyiq göstərdi. Amma qolu yenə “Kristal Pelas” vurdu. Sarr ofsaydda olduğuna görə Munyosun qolu sayılmadı. “Şəhərlilər” hücumları davam etdirsə də, onların bütün cəhdləri topu rəqibin cərimə meydançası ətrafında fırlatmaqla bitirdi, uzaqdan zərbələr isə nəticəsiz qalırdı. “Qartallar” sondakı hücum dalğasına da tab gətirməklə tarixində ilk titulu qazandı.
Faktlar
* Bu, “Kristal Pelas”ın tarixindəki ilk böyük tituldu. “Qartallar” əvvəllər yalnız aşağı divizonların çempionu olub və iki dəfə ölkə kubokunun finalında uduzub. London klubu bu qələbə sayəsində Avropa Liqasına vəsiqə qazandı, turnirin əsas mərhələsində oynayacaq. Bu da onların tarixində ilkdi.
* “Kristal Pelas”ı çalışdıran Oliver Qlasner məşqçi karyerasında 2-ci titulu qazandı. O, 2021/22 mövsümündə Avropa Liqasını qazanan “Ayntraxt”ın da “sükanı arxasında” olub.
* “Kristal Pelas”ın qələbəsindən sonra İngiltərə Superkuboku uğrundakı oyunun iştirakçıları müəyyənləşdi. “Qartallar” avqustun 9-da “Uembli”də keçiriləcək oyunda çempion “Liverpul”la qarşılaşacaq.
* Qvardiola mövsüm ərzində məğlubiyyət sayına görə şəxsi antirekordunu yenilədi. Bir mövsümdə 16 məğlubiyyət ispaniyalı mütəxəssis üçün növbəti antirekorddu. Onun MS-ni qəbul edənə qədər “Barselona” ilə “Bavariya”nı çalışdırdığını da xatırladaq.
* MS 2025-ci ildə yalnız bir titul qazana bilər. “Şəhərlilər”in yalnız iyunun 15-i – iyulun 13-ü aralığında ABŞ-də keçiriləcək klublarası dünya çempionatının qalibi olmaq imkanı var. "Siti” həmin turnirin qrup mərhələsində “Vidad”, “Əl-Əyn” və “Yuventus” ilə qarşılaşacaq.
Oyundan sonra
Xosep Qvardiola, MS-nin baş məşqçisi:
“Rəqib qapısına heç cür yol tapa bilmədik. Odu ki, “Kristal Pelas”ı qələbə münasibəti ilə təbrik edirəm. Gücümüz daxilində olan hər şeyi etdik. Yetərincə qətiyyətliydik. Ancaq qol vura bilməyən komandanın qələbə qazanması mümkünsüzdü. Yaxşı oyun göstərdik, hətta ötən mövsüm bu turnirin finalında “Mançester Yunayted”lə qarşılaşmadakından da yaxşı. Bəzən futbolda belə də olur – oyunun axarına nəzarət edir, amma uduzursan”
Oliver Qlasner, “Kristal Pelas”ın baş məşqçisi:
“Qələbəyə inana bilmirəm. Hədsiz çox müdafiə olunduq. Komanda ruhu möhtəşəm idi. Hər şey səbr ilə bağlıdı. Rəqibə boş zona verəndə necə təhlükəli olduğunu təhlil etmişdik. Dözməli olduq, rəqibin hücumlar qurmasına imkan verdik, özümüz hücum üçün zamanı gözlədik. Premyer-liqada bu komandaya 2:5 uduzandan sonra necə oynamalı olduğumuzu bilirdik. Adətən, daha çox hücum edirik, ancaq bu gün səbr göstərməli, şansımızı gözləməliydik. MS dörd hücum oyunçusu ilə oynayanda müdafiə olunmaq çətinləşir. Keçid mərhələsində rəqibə problem yaratmalıydıq. Heç bir vinger müdafiə olunmağı xoşlamır. Eze əla qol vurdu. Növbəti məşq artıq ləğv olunub. Futbolçular bazar ertəsi də məşqin olmamasını istəyir. Onlara xüsusi təşəkkür düşür. Heç vaxt mənə və məşqçi korpusuma inamı itirmədilər”.
Digər xəbərlər
