Həftəsonu dünyanın ən qədim turnirində yarımfinal oyunları keçirildi.

“Aston Villa”nı gözlənilmədən darmadağın edən “Kristal Pelas” 2015/16 mövsümündən sonra ilk dəfə ölkə kubokunun finalında oynayacaq. Həmin vaxt MY-yə uduzan “qartallar” indiyə qədər heç vaxt bu turnirin qalibi olmayıb.

Digər yarımfinal oyununda isə MS “Nottingem Forest”i məğlub etdi. Bu oyun “şəhərlilər”in aşkar üstünlüyü şəraitində keçdi. Lüis artıq 2-ci dəqiqədə hesabı açdı, fasilədən sonra Qvardiol fərqləndi.

Premyer-liqada ÇL-ə vəsiqə uğrunda mübarizə aparan “meşəçilər”in hədsiz zəif oyunu hamını təəccübləndirdi. Düzdü, sona yaxın “şəhərlilər”in qapıçısı Orteqa bir neçə dəfə oyuna qoşulmalı oldu. Həlledici oyun mayın 17-də “Uembli”də keçiriləcək.

Yeri gəlmişkən, “Siti” ardıcıl 3-cü dəfə finalda oynayacaq. Qvardiolanın komandası ötən mövsüm MY-yə uduzsa da, 2023-də həmşəhərlilərini məğlub edib. MS tarixində 14-cü dəfə ölkə kubokunun finalına oynayacaq. Yalnız MY (22), “Arsenal” (21), “Çelsi” (16) və “Liverpul” (15) bu göstəricidə “şəhərlilər”i qabaqlayır.

yarımfinal
Kristal Pelas – Aston Villa 3:0
Eze, 31. Sarr, 58; 90+4.

Nottingem Forest – Mançester Siti 0:2
Lüis, 2. Qvardiol, 51.
MS: Orteqa, Nunyeş, Diaş, Qvardiol, O’Rayli, Kovaçiç (Niko, 89), Lüis, Savinyo (Foden, 81), B.Silva, Qriliş (Gündoğan, 71), Marmuş (Dokyu, 81).