MS ardıcıl 7-ci dəfə yarımfinalda! - İCMAL
Həftəsonu keçirilən 1/4 final oyunlarından ikisində heç bir intriqa yaşanmadı.
Çempionlar Liqasında PSJ ilə qarşılaşacaq “Aston Villa”nın çempionşipin ortabablarından “Preston” önündə büdrəyəcəyini düşünmək sadəlövhlük olardı. Birmingemlilərin qələbəsində dubl edən Reşford önəmli rol oynadı. “Kristal Pelas” da səfərdə “Fulhem”i darmadağın etdi. Komandaların turnir cədvəlindəki mövqeyini nəzərə alsaq, belə nəticə bir qədər təəccüb doğurdu. “Brayton” – “Nottingem Forest” duelindən “meşəçilər” qalib ayrıldı. Premyer-liqada “ÇL zonası”nda qərarlaşan “Nottingem” rəqibin müqavimətini penalti seriyasında qırdı.
Nəhənglərdən yalnız “Mançester Siti” kubok uğrunda mübarizəni davam etdirir. Bu turnir “şəhərlilər” üçün mövsümü titulla bitirmək baxımından yeganə şansdı. Bəli, Qvardiolanın komandası yarımfinala vəsiqə qazandı. Ancaq məhz adı çəkilən mütəxəssisin zamanında etdiyi yerdəyişmələr sayəsində. İlk yarıda daha inamlı oynayan “Bornmut” hətta hesabı açmağı bacardı. Evanilson az qala qapı xəttinin üzərindən topu tora saldı. Düzdü, buna qədər, yəni 14-cü dəqiqədə MS gözəl şansı qaçırdı. Penaltini yerinə yetirən Holann qapıçı ilə dueldən məğlub ayrıldı.
Qvardiola fasilədən sonra oyunun axarına müdaxilə etməyi lazım bildi. O, əvvəlcə Xusanovu O’Rayli, ardından zədələnən Holannı Marmuş ilə əvəz etdi. Məhz O’Rayli 49-cu dəqiqədə norveçli ulduzun hesabı bərabərləşdirməsinə şərait yaratdı. Marmuş da 63-cü dəqiqədə O’Raylinin ötürməsindən sonra fərqləndi. “Şəhərlilər” əzmkar qələbə sayəsində yarımfinala adladı. Onu da xatırladaq ki, kubokun son qalibi “Mançester Yunayted”di. Mankunianlar ötənilki finalda məhz “Mançester Siti”ni məğlub etmişdi (2:1).
1/4 final
Bornmut – Mançester Siti 1:2
Evanilson, 21 – Holann, 49. Marmuş, 63.
MS: Ederson, Nunyes, Xusanov (O’Rayli, 46), Diaş, Qvardiol, Kovaçiç (Niko, 83), Gündoğan (Makeyti, 83), B.Silva, De Bruyne, Foden (Qriliş, 69), Holann (Marmuş, 61).
Preston (D-2) – Aston Villa 0:3
Reşford, 58; 63-p. Remzi, 71.
Fulhem – Kristal Pelas 0:3
Eze, 34. Sarr, 38. Nketia, 75.
Brayton – Nottingem Forest 0:0, p. – 3:4
Yarımfinal oyunları aprelin 26-27-də keçiriləcək: Nottingem Fores – Mançester Siti, Kristal Pelas – Aston Villa.
Oyundan sonra
Xosep Qvardiola, MS-nin baş məşqçisi:
“Biz bunu bacardıq. Ardıcıl 7-ci dəfə ölkə kubokunda yarımfinala adladıq. Bu, möhtəşəm nəticədi. O anlama gəlir ki, bu futbolçu nəsli uzun illər ərzində nəticə göstərməyi bacarır. Fasilədə uşaqlara dedim ki, oyunun taleyi sizin əlinizdədi, hətta qələbə qazanmasaz da. Hər birimiz çox razıyır. Belə nəticəyə nail olmaq asan deyil. Əvvəldən axıra qədər oyundan qopmadıq. Mövsümün sonuna qədər və gələcəkdə də belə olacaq”.
Digər xəbərlər
