Messinin komandası böhrandadı
Lionel Messinin və “dostlarının” şərəfini qoruduğu “İnter Mayami” ciddi böhrana düşüb.
Əslində mövsüm həm argentinalı superulduz, həm də onun komandası üçün yaxşı başlamışdı. Amma aprelin sonlarından etibarın nəticələr pisləşməyə başladı. Əvvəlcə Mayami təmsilçisi KONKAKAF Çempionlar Kubokunun yarımfinalında “Vankuver”ə ümumilikdə 1:5 uduzaraq mübarizəni dayandırdı.
MLS-də isə son 4 turda cəmi 4 xal qazanan komanda bazar ertəsinə keçən gecə evdə “Orlando Siti” önündə 3 cavabsız qol buraxaraq rüsvay oldu. Özü də qonaqlar bir qədər diqqətli olsaydılar, daha böyük hesabla qalib gələ bilərdilər. Bu, “İnter Mayami”nin son 7-ci rəsmi oyunda 5-ci məğlubiyyəti oldu! Öz zonasında bir ara lider olan komanda artıq 6-cı pilləyə qədər geriləyib.
“Qızıl top”un 8 qat qalibi son məğlubiyyətin ardından “Apple TV”yə açıqlamalar verib. O, komanda yoldaşlarını ruhlandırmağa çalışıb, eyni zamanda hakimlikdən şikayətlənib. Çünki son qarşılaşmada bir epizodda “Orlando”nun qapıçısı komanda yoldaşından qəbul etdiyi topu əlinə götürsə də, hakim oyunu davam etdirdi:
“Çətin dönəmdən keçirik. Amma həvəsdən düşməməli və əl-ələ verərək bunun öhdəsindən gəlməliyik. Əsl komanda çətinə düşdükdə bilinir. Çünki işlər yaxşı gedəndə hamıya asan olur. Ancaq bu cür çətinliyin öhdəsindən gəlmək asan olmur. Nəticələri yaxşılaşdırmaq üçün hər şeyə sahibik. Bu uğursuzluqları unudub növbəti matça köklənməliyik. Bu ayın sonuna qədər 3 oyunumuz qalıb. Klublararası DÇ-yə qədər psixoloji cəhətdən toparlanmalıyıq. Əslində ilk yarıda heç də pis təsir bağlşlamadıq. Rəqibə kifayət qədər çətinliklər yaratdıq. Onların qapıçısının komanda yoldaşından gələn topu əlinə götürməsi bir qədər qəribə oldu. Hakim mənə bununla bağlı qaydaları bilmədiyini dedi. Məhz həmin anda qapıçının uzun ötürməsindən sonra “Orlando Siti” hesabı açdı. Təbii ki, bu məqam uğursuzluğa bəhanə ola bilməz. Amma hakim səhvinin bəzən nəticəyə təsir göstərdiyi anlar olur. Burda həmişə hakimlərlə nəsə baş verir. Fikrimcə, MLS rəhbərliyi bu məsələyə və oyunlara təyinat alan hakimlərə daha çox diqqət ayırmalıdı”.
Digər xəbərlər
