Mahir Emreli “Nürnberq” karyerasındakı son matçda het-triklə yadda qaldı.

Millimizin hücumçusu bu komandanı heyətində 2-ci bundesliqda 10 qol, 1 məhsuldar ötürmə, ölkə kubokunda isə 1 qol ilə yadda qaldı. O, başa çatan mövsümdə 1575 dəqiqə meydanda olub və hər 143 dəqiqədən bir fərqlənib.

Mahirin məhz Almaniyada keyfiyyətcə yeni səviyyəyə qalxdığını iddia etmək üçün hər cür əsas var. Axı həmyerlimiz oyun və qol göstəriciləri üzrə nisbəti daha da yaxşılaşdırıb. Məsələn, Zaqreb “Dinamo”sunda 47 oyunda 10, “Legiya”da 33 oyunda 11 qol vurmuşdusa, “Nürnberq”də 11 qol həddinə 25 oyunda çatdı. Xorvatiya və Polşa nəhənglərinin formasını geyən Mahirin karyerasında bir də “Konyaspor” macərası var. Qardaş ölkədə keçirdiyi 12 oyunda 2 qol vurub.

Təbii ki, Almaniyanın 2-ci bundesliqası daha rəqabətli yarışdı. Bir Azərbaycanlının “böyük beşlik” ölkəsində bu səviyyəyə yüksəlməsinə ancaq sevinmək olar. Yeri gəlmişkən, Mahir 2-ci bundesliqda bombardirlik bacarığını göstərən yeganə postsovet məkanı təmsilçisi deyil. “Karlsrue”nin şərəfini qoruyan, mövsümü 12 qolla bitirən gürcü Budu Zivzivadze də var.

MÜZƏFFƏR QULUZADƏ