Bu gün Mahir Emrelinin formasını geydiyi "Nürnberq" Almaniyanın 2-ci bundesliqasında sonuncu - 34-cü tur oyununa çıxıb.

"Football-plus.az" xəbər verir ki, komanda səfərdə "Ayntraxt Braunşvayq"la qarşılaşıb. Mahir də bu matçda iştirak edib. O, oyuna start heyətdə başlayıb.

Emreli mövsümün sonunda komandanı tərk edəcəyinə görə, bugünkü matç onun "Nürnberq"də son oyunu olub. Bu matç onun üçün uğurlu olub.

Emreli 10-cu dəqiqədə hesabı açıb. O, 20-ci dəqiqədə komandasının 2-ci, 45+1-ci dəqiqədə isə 3-cü qolunu vurub. Mahir 20-ci dəqiqədə həm də sarı vərəqə alıb. Komandası isə 4:1 hesabı ilə qalib gəlib və mövsümü 48 xalla 10-cu yerdə başa vurub.
Qeyd edək ki, həmyerlimiz bu matç da daxil olmaqla 2-ci bundesliqada 24 oyunda 10 qol vurub. O, əlavə olaraq kubokda da bir matçda fərqlənib. Beləliklə, futbolçu Almaniyada mövsümü 11 qolla yekunlaşdırıb.