“Nürnberq”də işlərim normaldı. Az oynamağımın mənimlə əlaqəsi yoxdu. Hamımız peşəkar insanlarıq. Futbolçu kimi çalışıram ki, üzərimə düşən öhdəlikləri yerinə yetirim. Burda mənim edə biləcəyim başqa heç nə yoxdu” – bu sözləri “Report”a geniş müsahibəsində Mahir Emreli deyib. Söhbətin aprelin 1-də - Ümumdünya Gülüş Günündə reallaşması ağla bu cümlələrin gülüş məqsədilə deyildiyini gətirsə də, belə deyil. Təəssüf ki, Mahirin məqsədi bizi aldatmaq, səhvlərini ört-basdır etməkdi.

Bilirəm, xeyli çətin olacaq. Lakin təsəvvür edək ki, Mahir Emreli 2-ci bundesliqa çərçivəsində meydana çıxdığı 17 matçda 3 yox, azı 10 qol vurub. Məhsuldar ötürmələrinin sayı isə 1 yox, məsələn, 5-di. Və bundesliqaya can atan “Nürnberq”in baş məşqçisi Miroslav Kloze belə möhtəşəm hücumçuya yox, başqasına şans verir. Bizimki isə start heyətində yox, ehtiyat oyunçular skamyasındadı. Əlbəttə, belədə böyük məmnuniyyətlə Klozeni “ağ yuyub, qara sərərdik”. Elə Mahirin yuxarıdakı fikirləri də yerinə düşərdi.

“Nürnberq”in 19 yaşlı hücumçusu Stefanos Tzimas indiyə qədər meydana çıxdığı 24 oyunun 19-da start heyətində olub. O, bu görüşlərdə 12 qol, 3 məhsuldar ötürmə ilə yadda qalıb. Deməli, Mahirin az şans qazanmasının səbəbi məhz rəqabətdə uduzması, Klozenin Tzimasa daha çox ümid bəsləməsidi.

Deməli, bizi aldatmağa ehtiyac yoxdu, ay Mahir. “Nürnberq”in son 7 matçından birində əvvəldən sona qədər ehtiyat oyunçular skamyasında əyləşmisənsə, üçündə, ümumiyyətlə, iştirak ərizəsində yoxsansa, qalan oyunlarda cəmi 34 dəqiqə meydanda olmusansa, güzgüyə bax!

KƏNAN BAHADIR