"Şamaxı" cari mövsümdə ciddi maliyyə çətinliklərinə baxmayaraq, premyer-liqadakı yerini qorudu. Ancaq Ayxan Abbasov amili və "doşab aldım, bal çıxdı" məsəlini xatırladan futbolçular sayəsində istəyinə çatan bölgə təmsilçisi indi başqa problemlərlə üzləşib.

"Football-plus.az"ın məlumatına görə, söhbət ağla gələn ilk problemdən - klubun maliyyə durumundan gedir. Artıq Brahim Konatenin karyerasına "Zirə"də davam edəcəyi bəllidi. Vasiliye Radenoviç də məhz maddi məsələdə klubla razılığa gələ bilməyib və düşərgəni tərk edib. Vasiliye Bakiç isə süni ot örtüyündə oynamaq istəmədiyini bildirərək yola düşüb. Düzdü, aparıcı legionerlərdən sayılan Leroy Mikels hələ düşərgədədi. Ancaq o, "Sabah", "Neftçi" və "Araz-Naxçıvan"dann gələn təkliflərdən birini qəbul etmək niyyətindədi.

Maraq üçün qeyd edək ki, Masazır təmsilçisi hədəfləri, maddi şərtləri və Leroyun qardaşı Coy-Lensin bu kollektivdə forma geyməsi kimi səbəblərə görə futbolçu uğrunda mübarizədə daha şanslı görünür.

"Şamaxı"nın üzərindəki qara buludlar bununla məhdudlaşmır. Daha doğrusu, "şirlər" Ayxan Abbasovla da yolları ayırmağa yaxındı. Bəli, bu yaxınlarda mütəxəssislə klub arasındakı müqavilənin müddəti daha bir il artırılıb. Bu o demək idi ki, baş məşqçi 2025/26 mövsümündə də komandada çalışacaq. Lakin indi bu yöndə əminlik yoxdu. AFFA-nın klublara ayırdığı 3 milyon manatın 2,5 milyonaa endirilməsi planları pozub. "Şamaxı" gecəsini gündüzünə qatıb sponsor axtarışını davam etdirsə də, nəticə hasil olmur. Cari mövsümdə "əlini daşın altına qoyan", böyük risk alaraq yeni formalaşdırılan kollektivi yetərincə məhdud büdcə ilə premyer-liqada saxlamaq vəzifəsini üzərinə götürən Ayxan Abbasov indi belə riskə getmək istəmir. Bu istiqamətdə əsas maneələr sırasında təkcə klubun maliyyə durumu yox, mütəxəssisin həm də U-21 millisinin baş məşqçisi olması durur. Yəni iki önəmli istiqamətdə vacib öhdəlikləri yerinə yetirməyə çalışmaq Ayxan bəy üçün asan iş deyil və mümkün uğursuzluq fonunda imici təhlükə altına düşəcək. Bundan başqa, mütəxəssisin güclü maliyyə imkanlarına malik olan "Sabah"dan təklif aldığı haqda bilgilər də var.

Qısası, "Şamaxı" çox böyük sınaqla üz-üzədi və sadalanan problemlər fonunda çətinliklərdən üzüağ çıxmaq imkansız görünür.

KƏNAN BAHADIR