Çox güman, mövsümlərarası fasilədə “Şamaxı”da ciddi dəyişikliklər olacaq.

Bu komandanın baş məşqçisi Ayxan Abbasov “Araz-Naxçıvan”la oyundan sonra keçirilən mətbuat konfransında legioner futbolçularla bağlı diqqətçəkən fikirlər səsləndirib. O, Brahim Konatenin artıq “Zirə” ilə müqavilə bağladığını açıqlayıb. Bu transfer barədə rəsmi açıqlama verilməsə də, Ayxan Abbasovun boşuna söz demədiyi aydındı. Konate yeni mövsümə “Zirə”də başlayacaq.

Komandanın liderlərindən olan Leroy Mikelsin də gələcəyi dumanlıdı. Qış transfer dönəmində adı bir neçə klubla yanaşı hallanan Mikelsin mövsüm sonunda “Şamaxı” ilə müqaviləsinin müdddəti başa çatır. Futbolçunun “Araz-Naxçıvan”, “Sabah” və “Neftçi”nin maraq dairəsində olduğu deyilir.

Leoyla klub arasında yeni müqavilə ilə bağlı danışıqlar aparılsa da, tərəflər ortaq məxrəcə gələ bilməyib. Futbolçu yüksək maaş tələbi ilə çıxış edir ki, bu da “Şamaxı”nın büdcəsinə uyğun deyil.

Mikelsin də yay transfer dönəmində komandadan ayrılacağı gözlənilir. Belə görünür ki, “Şamaxı” yay fasiləsində söküləcək və yenidən yığılacaq.

ƏSƏD SEYİDOV