''Qalatasaray''ın çempionluğu rəsmiləşdirdiyi və 3:0 qalib gəldiyi ''Kayserispor''la qarşılaşmada ən çox müzakirə olunan məqamlardan biri də Fernando Musleranın penaltidən qol vurması oldu.

"Football-plus.az" xəbər verir ki, ''Qalatasaray'' və Türkiyə futbolu tarixinə adını qızıl hərflərlə yazdırmış təcrübəli qapıçı hesab 2:0 olarkən qazanılan penalti zamanı topun başına keçdi və yekun nəticəni müəyyənləşdirdi. Futbol ictimaiyyətində Musleranı dəstəkləyənlər də oldu, bu hərəkəti rəqibə hörmətsizlik kimi qiymətləndirib qapıçını tənqid edənlər də oldu.

Elə ''Fənərbaxça''nın çalışdırıcısı Joze Mourinyo da bu hadisəyə biganə qalmadı. O, ''Eyüpspor''la matçın ardından keçirilən mətbuat konfransında ''Qalatasaray''ın hesab 2:0 olarkən penaltini qapıçıya verməsi onların insanı keyfiyyətlərini göstərir'' ifadəsini işlətdi. Ancaq görünür, Mourinyonun yaşa dolduqca yaddaşında problemlər yaranıb. Çünki o, vaxtilə özünün də bu cür hərəkətə yol verdiyini unudub!

Bu hadisə ünlü mütəxəssisin ''Portu''da işlədiyi dönəmdə baş verib. ''Portu'' Mourinyo ilə ümumilikdə 6 titul qazanıb. Bunlardan biri 2002/03-də ölkə kuboku tituludu. Həmin vaxt 1/4 finalda ''əjdahalar'' evdə ''Varzim''lə qarşılaşmış və 7:0 hesabı ilə üstün olmuşdular. 2003-cü ilin martın 8-də baş tutan həmin oyunda hesab 6:0 olarkən ''Portu'' penalti qazandı və... topun başına qapıçı keçdi! Hazırda premyer-liqa təmsilçisi ''Nottingem Forest''i uğurla çalışdıran Nuno Eşpirito Santo həmin vaxt ''Portu''nun qapısını qoruyurdu və o, Mourinyonun icazəsi ilə penaltini dəqiq yerinə yetirərək yekun nəticəni müəyyənləşdirmişdi.

Ona görə də Mourinyo başqalarının insani keyfiyyətində problem axtarmaqdansa, ''Fənərbaxça''nı çempion etməyin yollarını tapsın.