Mahir karyerasını hansı klubda davam etdirəcək? - bütün detallar burda
Xəbər verdiyimiz kimi, Mahir Emrelinin formasını geydiyi "Nürnberq" Almaniyanın 2-ci bundesliqasında sonuncu - 34-cü tur oyununu keçirib. Nürnberliqlər Braunşveyqdə "Ayntraxt"ı darmadağın edib - 4:1.
Oyuna start heyətində başlayan həmyerlimiz 10-cu dəqiqədə hesabı açıb. Mahir 20-ci dəqiqədə ikinci, 45+1-ci dəqiqədə isə üçüncü qolunu vurub. Həmçinin 20-ci dəqiqədə sarı vərəqə alıb. Hücumçunun belə üstün performansı diqqətdən kənarda qalmayıb. Belə ki, o, 34-cü turun rəmzi komandasına düşüb. 27 yaşlı hücumçu 3-4-3 sxeminə əsasən tərtib olunan "11-lik"də hücumun mərkəzində yer alıb. "Nürnberq" isə mövsümü 48 xalla 10-cu yerdə başa vurub.
Yeri gəlmişkən, “Nürnberq”in baş məşqçisi Miroslav Kloze Mahirin komandadan gedişi haqda danışıb: “Emreli ilə əməkdaşlıq məsələsinə yenidən baxmaq? Qərarımızdan çəkilmirik. Bu qərar çoxdan verilib. Mahirin hansı böyük klublarda oynadığını, yüksək dəstədə oynayarkən hansı pulları qazandığını bilirik. Bununla belə, rəhbərliyim altında olan komandaya keçmək istədiyini dedi, çünki mənlə çalışdığına görə məmnun idi. Ancaq işinin öhdəsindən nə dərəcədə yaxşı gəlsə də, düzgün danışmalıyıq: onu saxlamaq şansımız yox idi. Mahirin getməsi onunla münasibətlərimizi pozmayacaq”.
Mahir özü isə bu klub və şəhər üçün darıxacağını deyib:
“Bəlkə də bəzi futbolçular “transfer pəncərəsi” ərəfəsində zədələnməmək üçün son oyunda meydana çıxmazdı. Ancaq mən fərqli mentallığa sahibəm. Sevgi və əməkhaqqı görürsənsə, həmişə tam gücünü qoymalısan. Xüsusən də bu şəhəri belə sevirsəndə. Təkcə mən yox, ailəm, anam da bu şəhəri, stadionu, atmosferi, azarkeşləri sevir. Nürnberq üçün darıxacağıq”.
Təbii ki, indi əsas suallardan biri da Mahirin karyerasını harda davam etdirəcəyidi. Futbolçunun fikirləri:
“Agentimə demişəm ki, mövsümün sonuna qədər məni narahat etməsin. Hələ heç nə həll olunmayıb. Mənim üçün lap son günə qədər bütün diqqətimi “Nürnberq”ə yönəltmək vacib idi”.
Almaniyanın əsas nəşrlərindən biri “Bild”in xəbərinə inansaq, azərbaycanlı hücumçu ilə maraqlananlar arasında 2-ci bundesliqada son mövsümü 7-ci yerdə bitirən “Kayzerslautern” də var. Bundan başqa, 1-ci bundesliqanın ən azı bir klubu onun xidmətində maraqlıdı.
Digər xəbərlər
