Futbol üzrə ölkə çempionatının 1-ci liqasında 26-cı tur da geridə qaldı.

Açılış matçında "Zaqatala"nı qəbul edən "Qəbələ" böyükhesablı qələbə qazandı. Hər iki hissədə üstün oyun sərgiləyən lider rəqibin sensasiyaya imza atmasına icazə vermədi. Matçdan sonra çempion qəbələlilər medallara və kuboka qovuşdu. Mükafatları Peşəkar Futbol Liqasının texniki-idman direktoru Elgiz Abbasov təqdim etdi. Xatırladaq ki, "qırmızı-qaralar" hələ 23-cü turda MOİK üzərində qələbə (1:0) sayəsində çempionluğu təmin etmişdi.

Maraqla gözlənilən "Difai" - "Cəbrayıl" matçında heç-heçə qeydə alındı. Belədə Ağsu təmsilçisinin 9-cu pillədən qurtulmaq çabası fayda vermədi. Ancaq qarabağlılar da arxayınlaşmamalıdı. Çünki komandalar eyni sayda xala malikdi. Bu o deməkdi ki, hər iki tərəf üçün təhlükə davam edir.

"İmişli" - "Baku Sportinq" qarşılaşmasında da qalib müəyyənləşmədi. Görünür, premyer-liqaya vəsiqə qazanan bölgə təmsilçisi psixoloji rahatlıqdan xilas ola bilmir. Axı ötən həftə də "Mingəçevir"lə bacarmamışdılar. Digər tərəfdən, bakılıların "düyünü açılmır". Elman Sultanovun komandası 9 (!) oyundu qələbə sevincindən uzaq düşüb. Qısası, "Baku Sportinq"in də mövsümü 9-cu pillədə bitirmək ehtimalı az deyil.

Tura Yevlaxda yekun vuruldu. "Qaradağ Lökbatan"ı qəbul edən "Karvan" xal itirdi. Halbuki komanda qələbə qazanmaqla "İmişli" ilə xalını bərabərləşdirə bilərdi. Hər halda, Fərid Namazovun komandası da 2-ci pilləni rəsmən təmin etməyib. Buna gələn həftə - mövsümün sonuncu turunda aydınlıq gələcək.

Gələk əsas məsələyə: "Qaradağ Lökbatan"ın 1-ci liqanı tərk edəcəyi rəsmiləşdi. Ona görə ki, komanda son turda qalib gəlsə, "Cəbrayıl" və "Difai" uduzsa belə, sonuncu sıradan qurtula bilməyəcək. Axı reqlamentə görə, xallar eynidisə, qələbələrin sayına baxılır. Və "Qaradağ Lökbatan" 5, Ağsu və Qarabağ təmsilçiləri isə 7 qələbə qazanıb...

1. Qəbələ 26 20 4 2 53-8 64
2. İmişli 26 14 7 5 40-19 49
3. Karvan 26 13 8 5 52-35 47
4. Zaqatala 26 8 10 8 35-33 34
5. Mingəçevir 26 8 8 10 28-35 32
6. MOİK 26 8 5 13 29-43 29
7. Baku Sportinq 26 7 6 13 21-43 27
8. Cəbrayıl 26 7 5 14 25-34 26
9. Difai 26 7 5 14 35-51 26
10. Qaradağ Lökbatan 26 5 8 13 27-44 23

Bombardirlər: Emil Qasımov (Karvan), Domi Massumo (Qəbələ) - 15, Bəhruz Teymurov (Karvan) - 13.

Sonuncu turun oyunları mayın 22-23-də keçiriləcək: Cəbrayıl - Zaqatala, Qəbələ - Qaradağ Lökbatan, Mingəçevir - Karvan, Baku Sportinq - MOİK, Difai - İmişli.

KƏNAN BAHADIR