Futbol üzrə ölkə çempionatının 1-ci liqasında 23-cü turu da geridə qoyduq.

Mösvümün sonuna az qaldığından bu matçlarda da həddən artıq gərginlik müşahidə edildi ki, bunu sürpriz saymaq yersiz olar. Əvəvlcədən bildirək ki, onsuz da böyük ölçüdə qətiləşən məsələlərə məhz bu turda aydınlıq gəldi – “Qəbələ”, nəhayət, çempion oldusa, “İmişli və “Karvan” da premyer-liqaya vəsiqə qazandı! İndi isə bir qədər ətraflı...

Autsayderlərin duelində maraqlı nəticə qeydə alındı. Bəli-bəli, söhbət “Qaradağ Lökbatan”ın “Difai”ni qəbul etdiyi matçdan gedir. Belə ki, qonaqlar fasiləyə öndə yollansalar da, özünü itirməyən və qəsa vaxtda toparlanan meydan sahibləri ardıcıl üç qolla qələbə qazandılar. Nəticədə sonuncu pillədən xilas olmaq istiqamətində inamlı addım atan lökbatanlılar üzərində olan psixoloji təzyiqi müəyyən qədər azaltdı. Öz aramızdı, Fərid Məmmədovun komandası 7 oyundu uduzmur. Belədə Ağsu təmsilçisi üçün həyəcan siqnalının çalındığını deyə bilərik.

Növbəti matçda “Baku Sportinq”i sınağa çəkən “Mingəçevir 4:0 (!) hesablı qələbə qazandı. Hər hissədə iki qol vuran komanda bununla təhlükəli zonadan bir qədər uzaqlaşsa da, arxayınlaşmaq olmaz. Turnir cədvəlində elə durum formalaşıb ki, nəinki 9-cu və 10-cu, 4-cü pillədə qərarlaşan “Zaqatala” belə 2-ci liqaya yuvarlansa, təəccüblənməyəcəyik. Deməli, elə Elman Sultanovun ağır məğlubiyyət üzündən yuxarı pillələrə yüksəlmək şansını puç edən komandası da narahat olmalıdı.

“Karvan” – “Cəbrayıl” qarşılaşmasında yevlaxlılar qalib gəldi. Gözlənilən idi. Qarabağ təmsilçisi hələ uğurlu mövsüm keçirən və sabit nəticələr qazanan rəqiblə dişə-diş mübarizə aparmaq iqtidarında deyil. Hər halda, “Karvan”ın vacib qələbə qazanmaqla premyer-liqanın qapısından daxil olması hadisələrin məntiqi ardıcıllığına uyğundu. Əlbəttə, məhz bu məqamı “İmişli”yə də aid etməliyik. “Zaqatala”nın meydanından üzüağ ayrılan bölgə təmsilçisini də növbəti mövsüm premyer-liqada görəcəyik. Bu o deməkdi ki, ilk “üçlük” uğrunda mübarizə aparan qalan komandaların ən iddialısı olan “Zaqatala” da hədəfinə çatmaq üçün azı 2025/26 “futbol ili”nin sonunu gözləməlidi.

Gələk əsas məsələyə. Bəli, MOİK-i qəbul edən “Qəbələ” çempion oldu. Lakin bunu çətinliklə bacardı. “Hərbçilər” liderin meydanında elə əzmkar oyun göstərdi ki, “qırmızı-qaralar” məqsədinə 90+7-ci dəqiqədə təyin edilən penaltini dəqiq yerinə yetirməklə çata bildi. Birinci liqada yuxarı pillələrlə bağlı intriqa bitdi. O başqa məsələ ki, həm “Karvan”, həm də “İmişli” mövsümü 2-ci yerdə bitirmək istəyir.

1. Qəbələ 23 18 4 1 46-5 58
2. İmişli 23 13 5 5 37-18 44
3. Karvan 23 12 7 4 48-30 43
4. Zaqatala 23 6 10 7 31-29 28
5. MOİK 23 7 5 11 27-39 26
6. Baku Sportinq 23 7 5 11 19-39 26
7. Mingəçevir 23 6 7 10 21-33 25
8. Cəbrayıl 23 6 4 13 21-29 22
9. Difai 23 6 4 13 31-45 22
10. Qaradağ Lökbatan 23 5 7 11 24-38 22

Bombardirlər: Bəhruz Teymurov, Emil Qasımov (hər ikisi “Karvan”) – 13, Domi Massumo (Qəbələ) – 12.
Növbəti turun oyunları mayın 1-2-də keçiriləcək: Cəbrayıl – Baku Sportinq, Difai – Mingəçevir, İmişli – Qaradağ Lökbatan, Zaqatala – MOİK, Karvan – Qəbələ.

KƏNAN BAHADIR