Martın 12-14-ü aralığında keçirilən oyunlarla futbol üzrə ölkə çempionatının 1-ci liqasında 18-ci tura yekun vuruldu.

2-ci dövrənin sonuncu turunda qeydə alınan nəticələrin hamısı sürpriz oldu desək, yanılmarıq. Ona görə ki, ilk “üçlük”də qərarlaşan komandaların hamısı heç-heçə etdi, "Difai" böyükhesablı qələbə qazandısa, "Mingəçevir" "İmişli"nin ardından MOİK-i də yendi. 

Detallara gəlincə, “Baku Sportinq” – “İmişli” qarşılaşmasında qalib müəyyənləşmədi. Bilindiyi kimi, bu oyun paytaxt təmsilçisinin premyer-liqaya yüksəlmək şansını artıra bilməsi baxımından əhəmiyyətli idi. Qonaqlar son dəqiqədə buraxdığı qol üzündən qələbəni əldən verdi. Yenə də Fərid Namazovun komandasının bu işdən daha qazanclı çıxdığını deyə bilərik.

Növbəti qarşılaşmada “Cəbrayıl” “Difai”ni qəbul etdi. Bu görüşdə Qarabağ təmsilçisinin azı bir qazanacağını düşünmək olardı. Lakin meydan sahiblərinin 25-ci dəqiqədə azlıqda qalması hadisələrin axarını dəyişdi. 76-cı dəqiqədə “Cəbrayıl”ın daha futbolçusu meydandan qovuldu ki, ağsulular fürsətdən maksimum istifadə edib böyükhesablı qələbə qazandı. Belədə “Difai” 9-cu pillədən qurtula bilməsə də, özündən əvvəlki “Cəbrayıl”a xal hesabında çatdı.

Turun üçüncü oyununda “Karvan” “Qaradağ Lökbatan”ın qonağı oldu. Autsayder işə hesabı açmaqla başlasa da, 2-ci hissədə buraxdığı qolla ideal şansı əldən verdi. Yevlaxlıların səfərdən sərfəli nəticə ilə qayıtdığını deyə bilərik. Onsuz da Kənan Kərimovun komandasının mövqeyi üçün hansısa təhlükə yoxdu.

Zaqatalada izlədiyimiz oyunda isə “Qəbələ” büdrədi. Düzdü, “qırmızı-qaralar” matça daha fəal başladı, həmçinin hesabı açdı. Amma 2-ci hissədə buraxılan qol liderin Zaqataladan 1 xalla ayrılmasıyla nəticələndi.

Tura “Mingəçevir” – MOİK oyunuyla yekun vuruldu. “Nur şəhəri”nin təmsilçisi 88-ci dəqiqədə vurduğu qolla minimalhesablı qələbə qazandı. Öz aramızdı, Füzuli Məmmədovun komandası ardıcıl 6-cı oyunda uduzmadı. O başqa məsələ ki, “hərbçilər”in durumu da pis deyil. Ortabablar sırasında qərarlaşan komandanın yeri rahatdı. “Mingəçevir” isə xal ehtiyatını artırmağa davam etməlidi. Hələ ki, təhlükəli mövqelərdən çox uzaqlaşmayıblar…

1. Qəbələ 18 14 4 0 34-4 46
2. Karvan 18 10 4 4 38-24 34
3. İmişli 18 9 4 5 29-16 31
4. Baku Sportinq 18 7 4 7 17-22 25
5. Zaqatala 18 5 8 5 23-23 23
6. MOİK 18 6 4 8 22-31 22
7. Mingəçevir 18 5 5 8 15-27 20
8. Cəbrayıl 18 4 4 10 15-23 16
9. Difai 18 4 4 10 23-32 16
10. Qaradağ Lökbatan 18 3 5 10 20-34 14

Bombardirlər: Bəhruz Teymurov, Emil Qasımov (hər ikisi “Karvan”) – 11, Seyxan Fərəcov (İmişli) – 9.
Növbəti turun oyunları martın 27-28-də keçiriləcək: MOİK – Difai, Karvan – Baku Sportinq, Zaqatala – Qaradağ Lökbatan, İmişli – Cəbrayıl, Qəbələ - Mingəçevir.

KƏNAN BAHADIR