“Zirə” Misli premyer-liqasının 35-ci turunda “Sabah”la heç-heçə etdi - 1:1.

“Football-plus.az” xəbər verir ki, oyundansonra keçirilən mətbuat konfransında meydan sahiblərinin baş məşqçisi Rəşad Sadıqov görüş haqda fikirlərini bildirib.

- Hər iki komandaya təşəkkür edirəm. Meydanda istəkli idilər. Oyuna tam gücümüzlə hazırlaşmışdıq. Xüsusilə, ikinci hissədə tələb etdiyim oyunu futbolçularım göstərdi. Bu hissədə üstün tərəf biz idik. Ümumilikdə faydalı 90 dəqiqə oldu.

– Gələn mövsüm heyətdə rotasiyalar gözlənilirmi? Bu il hansı klublardan futbolçular hədəfdədi?
- Bəli, yəqin ki, rotasiyalar olacaq. Keçmiş mövsümlərdə “Qəbələ” və “Kəpəz”dən futbolçular heyətimizə qoşulmuşdu. Bu il də müqaviləsi başa çatan futbolçuları diqqətdə saxlayırıq. Bəyəndiyimiz oyunçular çoxdu, lakin konkret olaraq hansı klubdan transfer edəcəyik deyə bir şey yoxdu. Hansı mövqelərə ehtiyac varsa, oraları gücləndirməyə çalışacağıq.

– 71 xal topladığınız mövsümdə çempion “Qarabağ”ın rolunu necə qiymətləndirirsiz? Stadion problemi yaşadığınız vaxt sizə yardım etdilər.
- “Qarabağ”a təşəkkürümüzü bildiririk. Doğrudan da, biz meydan problemi yaşadığımız vaxt onlar bizə şərait yaratdılar. Eyni zamanda, “Neftçi” rəhbərliyinə də minnətdarıq. Onlar da qapılarını bizə açdılar, təlim-məşq bazalarında məşqlər keçməyimizə imkan verdilər. Meydansız heç bir yol tapmaq olmur. Bu iki kluba bir daha təşəkkür edirəm. Öz bazamızın olması isə bizim əsas məqsədlərimizdəndi.

– Əvvəllər deyilirdi ki, yer alınıb. Baza ilə bağlı plan nə yerdədi?
- Bəli, böyük baza inşa etməyi planlaşdırırıq. Amma bunun üçün təbii ki, büdcə lazımdı. Üzərində işləyirik. Gələcək üçün vacib məsələdi.

– Mayın 31-də kubokun finalında kimə azarkeşlik edəcəksiniz?
- Bizim yerimizdə kim olsa, Avropa Liqasına vəsiqə qazanmaq istəyər. “Araz-Naxçıvan”, “Turan Tovuz” bu mövsüm avrokuboklarda iştirak etməyə layiqdi. Təəssüf ki, hansısa komanda kənarda qalacaq. Açığı, “Sabah”ın da avrokuboklarda olmasını istəyirəm.

– Klubla müqaviləniz başa çatır. Gələcək planlarınız necədi?
- Hələlik rəhbərliklə rəsmi danışıqlar aparılmayıb. Ancaq nə qədər istəsələr, burda olmağa hazıram. Yaxın günlərdə bir toplantı planlaşdırılır. Orda məsələ müzakirə olunacaq.

ƏSƏD SEYİDOV