"Zirə" KL-nin 3-cü təsnifat mərhələsinin ilk oyununda "Osiyek"lə heç-heçə edib - 1:1.

"Football-plus.az" xəbər verir ki, qəsəbə təmsilçisinin baş məşqçisi Rəşad Sadıqov matçdan sonra keçirilən mətbuat konfransında iştirak edib:

- Birinci hissədə meydanda daha çox taktiki savaşın şahidi olduq. Rəqib standart vəziyyətlərdə təhlükəli olurdu. Bir neçə təhlükəli hücumumuz var idi, fərqlənə bilərdik. Sonra müdafiədən çıxarkən top itkisinə yol verdik. Rəqib dərhal bundan istifadə edib hesabı açdı. İkinci hissədə meydanda üstün olan tərəf biz idik. Hesabı bərabərləşdirməyə çalışırdıq. Müəyyən məqamlarda dəqiqlik çatmırdı. Rəqibin səviyyəsini nəzərə almaq lazımdı. Məğlub olsaydıq belə, hər şey ikinci oyunda həll olunacaqdı. Hər iki komanda sıfırdan başlamalıdı. Bir həftə sonra bizi çox maraqlı oyun gözləyir.

- "Osiyek"in heyətində hansı futbolçular sizi təəccübləndirdi?
- Rəqib istedadlı futbolçulardan ibarətdi. Gənc, istəkli, yaxşı məşqçiləri var. Onun səviyyəsini hiss edirdik. Rəqibdən nə gözləyirdiksə, onu meydanda gördük. Futbolçularıma təşəkkür edirəm. Bizi çox məsuliyyətli cavab oyunu gözləyir.

- Cavab matçından gözləntiləriniz nədi?
- İndi daha çox çempionatımızda "Sabah"la oyunu düşünəcəyik. Sonra "Osiyek"lə oyuna hazırlığımızı görəcəyik. Cavab matçında bundan daha istəkli, daha güclü "Osiyek" gözləyirəm. Biz də eyni qarşılıq verəcəyik. Bu gündən daha yaxşı olmaq istəyirik. Azarkeşlər üçün çox maraqlı oyun olacaq.

- Rəqibin çox da güclü futbol oynamadığını demək olar?
- Azərbaycan futbol camiəsində illərdi belə fikir formalaşıb ki, hər hansı klubumuz uğurlu çıxış edirsə, dərhal deyirlər ki, bu rəqibə qarşı oynamaq olar. Ümumən müasir futbolda hər komandaya qarşı oynamaq olar. Amma bu gün vacib olan o idi ki, ikinci hissədə biz oyunu bərabərləşdirə bildik və rəqib üzərində bir az da olsa, üstünlük yaratdıq. Futbolçular məğlub olmaq istəmirdi. "Osiyek" çox yaxşı komandadı. Artıq belə təcrübə yaşamışıq. İkinci oyunda Bakıda daha istəkli "Şerif" gördük. İstərdim ki, bu məsələyə daha təcrübəli yanaşaq.