Niderland çempionatında bu mövsüm qəribə hadisələr baş verməkdə davam edir.

''Football-plus.az'' xəbər verir ki, cəmi 1 ay öncə hər kəs ''Ayaks''ın asanlıqla çempion olacağını düşünürdü. Çünki 29-cu turdan sonra, yəni sona 5 tur qalmış ''Ayaks'' ən yaxın rəqibi PSV-dən 9 xal öndə idi! Amma sonradan Amsterdam nəhənginə nəsə oldu.

Komanda əvvəlcə ''Utrext''dən 4 cavabsız qol buraxmaqla darmadağın oldu. Sonra evdə ''Sparta'' ilə 1:1 bərabərə qaldı. ''Ağ-qırmızılar'' ötən həftəsonu evdə ''Neymegen''ə 0:3 uduzmaqla fanatlarını növbəti dəfə şoka saldı. Halbuki buna qədər ''Ayaks'' evdə 15 oyundan 12 qələbə, 3 heç-heçə ilə ayrılmışdı. Bütün bu turlar ərzində qələbələri sıralayan PSV 32-ci turda hətta səfərdə ''Feyenoord''la görüşdə 2 topluq geriliyi aradan qaldıraraq 3:2 qalib gəldi. 33-cü turda isə ''Ayaks'' yenə böhrandan çıxa bilmədi. Françesko Fariolinin komandası ''Qroningen'' ilə səfər matçında qələbəni 90+9-cu dəqiqədə əldən verdi (2:2). PSV isə ''Herakl'' üzərində 4:1-lik qələbə qazanaraq son tur ərəfəsində liderliyi ələ keçirdi!

Maraqlıdı ki, PSV özü də mövsümün gedişində 9 xallıq üstünlüyü əldən verməyə macal tapmışdı. 15-ci turdan sonra bu komanda ''Ayaks''dan məhz 9 xal öndə idi. Amma Eyndhoven nəhənginin növbəti 7 turda cəmi 1 qələbə qazanmasının, ''Ayaks''ın isə 14 turun 13-də qalib gəlməsinin ardından vəziyyət dəyişmişdi. Göründüyü kimi bu mövsüm erediviziyanın nəhəngləri çox enişli-yoxuşlu qrafik cızır.

Beləliklə, PSV son turda səfərdə ''Sparta''nı məğlub edəcəyi təqdirdə ardıcıl 2-ci, tarixinin 26-cı çempionluğunu qazanacaq. Artıq taleyi öz əlində olmayan ''Ayaks''ı isə son turda evdə ''Tvente'' ilə oyun gözləyir.