Ötən il futbolçu karyerasını başa vuran Klaas-Yan Huntelaar yenidən sabiq klubuna xidmət edəcək.

Ona “Ayaks”da vəzifə verilib. 38 yaşlı sabiq hücumçu bundan sonra Amsterdam klubunun idman departamentində çalışacaq. Huntelaar “Ayaks”ın idman direktoru vəzifəsindən qovulan Mark Overmarsı müvəqqəti əvəz edən Cerri Hamstrana kömək edəcək. O, klubla müddəti 2024-cü ilin iyuluna qədər nəzərdə tutulan müqavilə bağlayıb.

Xatırladaq ki, Niderland millisində 76 oyuna 42 qol vuran Huntelaar “Ayaks”da 2006-09 və 2017-21-ci illərdə çıxış edib. O, bu komandada bütün turnirlərdə 257 oyunda 158 qol vurub. Huntelaar karyerası ərzində PSV, “Qraafshap”, AGOVV, “Herenven”, “Real”, “Milan” və “Şalke-04”də də oynayıb.