“Ayaks” sıralarına yeni oyunçu cəlb edib.

“Piza”nın hücumçusu Lorentso Lukka Amsterdam klubuna keçib. O, “Ayaks” ilə birillik müqavilə bağlayıb. Niderland klubu 21 yaşlı futbolçunu sonradan transfer hüququna sahib olmaq şərti ilə icarəyə götürüb. Qeyd edək ki, 201 santimetr boya malik olan Lorentso “Ayaks” ın tarixinə ilk italyan futbolçu kimi düşüb.
Brayan Brobbi yenidən “Ayaks”ın oyunçusu olub. Niderland klubu yetirməsinə sahib çıxıb. “Ayaks” onun transfer hüququna görə “Leyptsiq”ə 16,35 milyon avro ödəyib. 20 yaşlı hücumçu son mövsümü doğma klubunda icarə əsasında keçirmişdi. Brayan Almaniya klubuna 2021-ci ilin yayında azad agent kimi keçmişdi.
Yeri gəlmişkən, “Mançester Yunayted” rəhbərliyi Antonini almaqdan imtina edib. İngiltərə klubu “Ayaks”la 22 yaşlı yarımmüdafiəçinin transferi ilə bağlı apardığı danışıqları dayandırıb. Buna amsterdamlıların braziliyalı futbolçuya görə 100 milyon avro tələb etməsi səbəb olub. MY yalnız “Ayaks”ın maliyyə tələblərini əhəmiyyətli dərəcədə aşağı salacağı halda danışıqları bərpa edə bilər.
Antoni Amsterdam klubunda 2020-ci ildən çıxış edir. O, ötən mövsüm Niderland çempionatında iştirak etdiyi 23 matçda 8 qol vurub və 4 qolun ötürməsini verib.