Françesko Farioli Niderlandda adından söz etdirməkdə və ''Ayaks''ı çempionluğa daşımaqda davam edir.

''Football-plus.az'' xəbər verir ki, mövsümün əvvəlində Amsterdam nəhənginin başına keçən və klub tarixinin ilk italiyalı məşqçisi olan 35 yaşlı mütəxəssis fərq yaratmaqda davam edir. ''Ayaks'' Niderland çempionatının son turunda əzəli rəqibi, ən yaxın izləyicisi və son çempion statusunda olan PSV-ni səfərdə 2 cavabsız qolla məğlub edərək liderliyini bir qədər də möhkəmləndirdi. ''Yəhudilər'' sona 7 tur qalmış xal fərqini 9-a yüksəldərək çempionluq yolunda çox mühüm bir addım atdılar.

Düzdü, Avropa Liqası macərası komanda üçün uğursuz alındı. ''Ayaks'' 1/8 finalda ''Ayntraxt''a hər iki oyunda uduzaraq mübarizəni dayandırdı. Amma erediviziyada işlər qaydasında gedir. Amsterdamlılar son 12 çempionat oyunundan 11 qələbə, 1 heç-heçə ilə ayrılıblar. PSV üzərində qazanılan son qələbə ilə Farioli artıq indidən adını klub tarixinə yazdırdı. Belə ki, o, ''Ayaks''ın başında ilk mövsümdə iki əsas rəqib - ''Feyenoord'' və PSV-yə qarşı 4 çempionat matçının hər birindən qələbə ilə ayrılan ilk məşqçi oldu! ''Ayaks'' ilk dövrədə PSV-ni 3:2 yenmişdisə, ''Feyenoord''a qarşı oyunlarda səfərdə 2:0, evdə 2:1-lik qələbələr əldə olunmuşdu.

Xatırladaq ki, 35 yaşlı Farioli məşqçi karyerasına Türkiyədə start verib. O, 2021-ci ildə ''Fatih Karagümrük''ün başına keçmişdi. Daha sonra ''Alanyaspor''u da çalışdıran bu mütəxəssis ötən mövsümü isə ''Nitsa''da keçirmişdi.