Tarixinin ən bərbad dönəmini yaşayan “Ayaks”da yeni baş məşqçinin adına aydınlıq gəlib.

Xatırladaq ki, komanda mövsümə Moris Steynlə başlasa da, bu mütəxəssislə bir həftə öncə yollar ayrılmışdı. Ötən həftəsonu PSV-yə qarşı prinsipial oyunda amsterdamlıları meydana Hedviqes Maduro çıxarmışdı. Amma komanda 2:5 hesabı ilə uduzaraq fanatlarına daha bir şok yaşatmışdı. Tarixində ilk dəfə erediviziyada ardıcıl 5 məğlubiyyət yaşayan “Ayaks” hazırda turnir cədvəlində sonuncu pillədə qərarlaşıb! Komandanın rəsmi matçlardakı qələbəsiz seriyası isə 10 oyuna bərabərdi.

"Football-plus.az" xəbər verir ki, “Ayaks”da yeni təyinat reallaşıb. Baş məşqçi postuna Con van`t Ship gətirilib. 59 yaşlı nideerlandlı mütəxəssislə 2025-ci ilin iyunun 30-na qədər müqavilə imzalanıb. Amma bu təyinat müvəqqəti xarakter daşıyır. Belə ki, Van`t Ship mövsümün sonunda baş məşqçi postundan ayrılaraq klubda texniki menecer vəzifəsini tutacaq. 1963-cü ildə Kanadada doğulan Van`t Ship “Ayaks”ın öz yetirməsidi və futbolçu kimi bu klubda 11 il (1981-92) top qovub. Elə məşqçi karyerasına da “Ayaks”ın akademiyasında başlayan Van`t Ship indiyə qədər “Tvente”, “Melburn Hart”, “Qvadalahara”, “Melburn Siti”, “Zvolle” və son olaraq Yunanıstan yığmasını çalışdırıb. Böhranda olan “Ayaks”ın belə vəziyyətdə məhz bu məşqçi ilə anlaşması qəribə görünür. Çünki onun 2016-cı ildə “Melburn Siti” ilə qazandığı Avstraliya kubokundan başqa məşqçi karyerasında heç bir ciddi uğuru yoxdu. Üstəlik o, 2021-in dekabrından, yəni Yunanıstanın baş məşqçi vəzifəsindən qovulduqdan bu yana heç yerdə işləməyib. “Ayaks” növbəti oyununu noyabrın 2-də keçirəcək. Komanda 3-cü turdan təxirə salınmış oyunda öz meydanında “Volendam”ı qəbul edəcək.