''Qalatasaray''ın ölkə kubokunu qazanması ilə birlikdə faktiki olaraq superkubokda qarşılaşacaq rəqiblər bəlli oldu.

Məlum olduğu kimi Türkiyə superkuboku artıq yeni formatla - 4 komandanın iştirakı ilə keçiriləcək.

Türkiyə Futbol Federasiyası bir neçə həftə öncə yeni formatın detallarını açıqlamışdı. ''Qalatasaray'' böyük ehtimalla kubokdakı zəfərin ardından bu həftəsonu superliqada da çempionluğu rəsmiləşdirəcək. Yeni formata əsasən superkubokun bir yarımfinalında ölkə çempionu ilə kubokun finalçısı, digər yarımfinalda kubokun qalibi ilə superliqanı ikinci pillədə tamamlayan kollektiv üz-üzə gəlməlidi. ''Qalatasaray'' bu mövsüm həm kubokun qalibi olduğundan, həm də superliqada mövsümü ilk iki pillədə bitirməyi rəsmiləşdirdiyindən 3-cü pilləni tutan komanda da superkubokda iştirak edəcək.

Beləliklə, yarımfinalda ''Qalatasaray'' ilə kubokun finalçısı, yəni ''Trabzonspor'' və ''Fənərbaxça'' ilə superliqanın 3-cü pillədə bitirən kollektiv qarşılaşacaq. Hazırda bu pillədə ''Beşiktaş'' qərarlaşıb. Bu cütlərin qalibləri həlledici oyunda üz-üzə gələcək. Oyunlar gələn ilin yanvarında, neytral meydanda keçiriləcək. Qalib bir oyunla müəyyənləşəcək.